Siglir tar il cuntegn

Surselva Remo Stoffel en dispita cun la «Rundschau»

L'investider grischun Remo Stoffel sa drizza pervi da la «Rundschau» da SRF a l'Instanza independenta da recurs da radio e televisiun UBI.

L’investider Remo Stoffel
Legenda: L’investider Remo Stoffel durant ina preschentaziun da ses projects en Val S. Pieder. Keystone

Stoffel reclomia perquai ch'ina emissiun da la «Rundschau» haja violà il princip d'objectivitad, ha ditg l'advocat da Stoffel a la «NZZ am Sonntag». La contribuziun e l'intervista n’èn tenor Stoffel betg stadas equilibradas. Quai malgrà ch’el ha pudì s’exprimer en ina lunga intervista en il studio davart las temas e rinfatschas che critichers han menziunà en la contribuziun.

L'emissiun dals 9 da mars aveva tematisà la vendita da la terma da Val S. Pieder. Pervi da reservas zuppadas supponidas duai Stoffel avair survegnì la terma bler memia bunmartgà. Sinaquai aveva l’investider grischun gia protestà tar il mediatur public da la SSR Svizra tudestga Roger Blum, dentant per gronda part betg survegnì raschun.

RR novitads 06:00