La Confederaziun ed il chantun han empermess a la gastronomia sustegn finanzial cun la regulaziun dals cas da direzza. Ustiers che han pir dacurt surpiglià in manaschi crodan sco quai ch’i para or dal sistem. La raschun è, ch'els n'han betg avunda cifras da cumparegliaziun.
Situaziun pauc agreabla
Reto e Saskia Gadola mainan dapi l’avust 2019 la Chasa Alva a Trin, in pitschen hotel cun 6 chombras e l’ustaria. La dumonda da sustegn ord la regulaziun dals cas da direzza ha il chantun refusà
Nus avain cumenzà l’avust 2019 ed avain gì enfin il lockdown plitost pitschnas svieutas durant noss emprims mais. Suenter la serrada e durant la stad avain nus gì bler da far cun bunas svieutas. Quai tanscha para gia, ch’i na dat nagin sustegn.
Er il criteri ch'il manaschi ha stuì serrar dapli che 40 dis pervia da l'ordinaziun da la Confederaziun n'ha il chantun betg resguardà. In fatg mo mal chapibel per Reto Gadola.
Ils criteris cun ils 40 dis ademplin nus segir, gliez è gea cler, nus avain gea stuì serrar. Jau sai era betg vi da tge ch’i giascha exact. Nus vegnin segir a chavar suenter, perquai che nus essan da l'avis che nus avessan da bun insatge.
Dar si n'è nagina opziun
Er sch’i vess da dar nagin sustegn finanzial da Confederaziun e chantun na bitta Reto Gadola betg la fautsch en chanvà. Cun agid da la famiglia vulan el e sia dunna Saskia puspè avrir las portas suenter la pausa sfurzada. En il mender cas, sch’i sto esser, era pir il matg.
