Siglir tar il cuntegn

Header

audio
La carta da giasts da Sedrun/Mustér discrimineschia ils possessurs d'abitaziuns secundaras
Or da Actualitad dals 05.05.2021.
laschar ir. Durada: 3 minutas 30 Secundas.
cuntegn

Regiun Sedrun/Mustér Carta da giasts procura per malcuntentientscha

Per ils possessurs d'abitaziuns secundaras èn las purschidas da las pendicularas limitadas sin 7 dis en fila. Quai na saja betg propi attractiv per quels che pajan quasi 70% da la taxa da turissem.

Da discriminaziun discurran ils possessurs d'abitaziuns secundaras a Mustér e Tujetsch en connex cun la carta da giasts per la stad che vegn. Els hajan udì tras las medias che las prestaziuns da la carta da giasts sajan vegnidas scursanidas en lur disfavur. Quai scrivan las gruppas d'interess dals possessurs d'abitaziuns secundaras a Mustér e Tujetsch.

Purschida restrenschida

Per ils possessurs d'abitaziuns secundaras èn las purschidas da las pendicularas limitadas sin 7 dis en fila. Quai na saja betg propi attractiv per quels che pajan quasi 70% da la taxa da turissem. Cun quella taxa vegnia tranter auter finanzià la carta da giasts e las reducziuns da la purschida sajan uschia betg giustifitgadas. Ils possessurs d'abitaziuns secundaras vegnian pia degradads tar giasts da segunda classa.

Tut ils auters giasta possian numnadamain nizzegiar las purschidas da las pendicularas durant l’entir temp da vacanzas, di la presidenta dad lG Tujetsch, Vreni Müller-Hemmi, ensemen cun la presidenta da l’uniun da passeurs d'abitaziuns secundaras da Mustér IGZWD, Barbara Matzenauer. Els vegnian uss ad examinar quella discriminaziun giuridicamain ed examinar, sch’ins dastgia insumma far ina tala differenziaziun.

Dialog manca

Per las duas uniuns manca il dialog sin la medema autezza. Quai dian tant Vreni Müller-Hemmi sco era Barbara Matzenauer. L’intenziun da las duas uniuns saja dapi sis onns da meglierar il dialog e questa ruptura da confidenza saja perquai grev da chapir. Era scrivan las duas uniuns che las vischnancas hajan dictà a Sedrun-Mustér turissem la carta da giasts, senza manar in dialog.

Betg tut sto esser en la carta da giasts

La carta da giasts saja stada ils ultims onns ina fitg buna purschida era per els sco possessurs d'abitaziuns secundaras. Perquai hajan els era adina ditg che betg tut stoppia esser gratuit. Els sappian gea era che las finanzas sajan limitadas. Ma che la purschida dal traffic public da la Viafier Matterhorn-Gotthard na saja per tuts betg pli integrada, saja gia in svilup pauc legraivel. Perquai hajan els sco uniuns dals possessurs d'abitaziuns secundaras era argumentà, ch’ins duai far in pass suenter l’auter e dar plitost prioritad a las purschidas dal traffic public.

RTR novitads 11:00

Artitgels legids il pli savens