Siglir tar il cuntegn
Inhalt

Surselva Reavertura dal «Dulezi» a Trun

Ina famiglia portugaisa ha surpiglià l’ustaria Dulezi a Trun suenter che quella è stada plirs onns serrada.

Ustaria dal Dulezi a Trun
Legenda: Suenter intgins onn datti puspè vita en l’ustaria dal Dulezi a Trun. RTR, Gion Hosang
Tiago Ferreira e sia mamma Manuela Flores De Figueiredo fan ir l'ustaria.
Legenda: Tiago Ferreira e sia mamma Manuela Flores De Figueiredo fan ir l'ustaria. RTR, Gion Hosang

Tiago Ferreira e sia mamma Manuela Flores De Figueiredo avevan a Sedrun ina pitschna butia cun in café. Ussa han els tschertgà autras localitads e chattà questas a Trun en l’anteriura ustaria Dulezi. L’ustaria che ha da nov num Cantinho de Portugal, porscha plaz per 120 persunas. Manuela Flores De Figueiredo che maina l’ustaria cuschina era gist sezza.

Purschidas vegnan cunzunt spezialitads portugaisas. Quai èn savens tratgas cun peschs. Sco Tiago Ferreira di, hajan els explicit vulì porscher insatge, ch’i na dat anc betg en la regiun. I na saja betg ina ustaria mo per Portugais – tut ils giasts sajan cordialmain bainvegnids. Ils indigens laschan lura era plaschair che l’ustaria saja puspè averta. Els vegnan gugent a baiver in café.

Era la bar è puspè averta

Ina part da l’ustaria dat spazi a la butia che la famiglia ha stuì serrar a Sedrun. En quella datti cunzunt chaussas portugaisas ch’ins na chatta uschiglio betg en butias indigenas. L’ustaria è averta da mardi fin dumengia. Venderdi e sonda è era mintgamai la bar averta da las 23.00 fin las 4.00.

Ina tala purschida na dettia quai betg en il conturn, di Tiago Ferreira. Quai saja stà ina raschun ch’els hajan era prendi a tschains quest local. I saja in manaschi da famiglia. Ses bab che lavuria sco miradur sa gidia cun els, e sch’i dovria ulteriur agid, possian els dumandar enconuschents da gidar.

RR actualitad 11:00