Per l’avust ha l'Uffizi da chatscha e pestga confermà 19 attatgas da lufs sin muntaneras d’animals da niz. En tut èn 37 nursas e 13 chauras vegnidas mazzadas. Quai dumber è cumparegliabel cun ils mais passads. En quatter cas han ils lufs surmuntà las mesiras da protecziun e fatg donn en muntaneras protegidas cun chauns da protecziun u saivs electrifitgadas. Tar 10 ulteriuras attatgas eran las muntaneras protegidas, ils animals stgarpads sa chattavan dentant ordaifer la saiv.
L’avust èn vegnids annunziads set vadels morts e per part magliads. Tar in vadè datti la conferma ch’el è vegni stgarpà d’in luf
Ulteriuras cumprovas
Dasper ils stgarps èn vegnidas annunziadas 50 ulteriuras cumprovas da lufs a l’Uffizi da chatscha e pestga dal Grischun. Quai èn observaziuns visualas, fastizs, excrements ubain urlar da lufs. Plinavant è vegni confermà in nov triep da lufs entadim la Val d’Alvra. En il Grischun datti uschia entant set trieps da lufs.
Il luf-tscherver è vegnì observà 19 giadas e quai en Surselva, l’Engiadina, il Partenz sco era en la regiun dal Plaun ed en la Viamala.
Per tadlar curt e concis:
