Siglir tar il cuntegn
Inhalt

Surselva Puspè rut en en il Center da sport e cultura a Mustér

I n’è betg l’emprima giada ch’igl è vegnì rut en en il Center da sport e cultura a Mustér. Entant ch’il donn è grond è la preda pitschna.

Legende: Video Mustér – puspè rut en en il Center da sport abspielen. Laufzeit 01:32 Minuten.
Or da Telesguard dals 12.04.2016.

La sonda notg sin la dumengia è vegnì rut en en il Center da sport e cultura (CSC) a Mustér. Differents automats da gieus, cigarettas e snaks èn vegnids donnegiads per prender ora ils daners u il cuntegn. Il u ils laders han recaltgà uschia ina preda da var 500 francs. Ils donns ch’èn sa resultads vegnan dentant calculads cun 5000 fin 6000 francs.

Betg l’emprima giada

Ch’i vegn adina puspè rut en en il CSC a Mustér ha probabel da far cun il lieu dal center. Il president da la cumissiun da manaschi dal CSC e suprastant communal, Roger Tuor suppona ch’il risico saja perquai forsa pli pitschens da vegnir traplà. Latiers vegnia che nagin saja en il center durant la notg. Gia las ultimas giadas hajan ins meglierà la situaziun en il lieu nua ch’i saja vegnì rut en. Ma ils laders chattian adina autras lieus per rumper en en il center, di Roger Tuor.

Cameras da surveglianza

Ins haja schizunt gì il responsabel da la polizia pertutgant la surveglianza cun cameras. Lez haja manegià ch’ins possia bain installar talas, ma che quellas na vegnian betg ad evitar infracziuns. Tenor Roger Tuor vegnian ins ussa tuttina a far ponderaziuns d’installar ina camera. Forsa possia tuttina starmentar in pau ils laders e tut tenor reducir l’attractivitad da rumper en en il Center da sport e cultura.