Siglir tar il cuntegn

Header

audio
Musicas e chors dastgassan puspè trenar, han però dubis
Or da Actualitad dals 30.05.2020.
laschar ir. Durada: 3 minutas 57 Secundas.
cuntegn

Puspè far musica e chantar Ils chors e las musicas dastgan puspè exercitar

Las musicas ed ils chors n’han betg gì la pussaivladad da s’entupar las ultimas emnas. Quai sa mida uss. Cun recumandaziuns èsi uss pussaivel da far exercizis. Uschia ha l’Uniun svizra dals chors gist tramess quatter paginas cun recumandaziuns als chors. Quella che fa il pli bler quitads è la distanza. Han ils chors insumma avunda plaz per far lur exercizis? Uschia vegn recumandà quatter meters quadrat per persuna. Perquai scriva l’Uniun svizra dals chors da limitar ils exercizis sin gruppas ni registers. Era vegn recumandà da tegnair distanza da dus meters en direcziun ch’ins chanta e dus meters distanza tranter las persunas.

Chantar munta era chantar ensemen

Per Clau Scherrer il dirigent dal «Cantus Firmus Surselva» èsi grev per ils chantadurs da tegnair las distanzas. Blers sajan gugent datiers per udir il vischin e per chantar uschia communabel. Era saja per exempel durant in exercizi impurtant d'articular bain, ma gist quai possia chaschunar ch’ils erosols sa derasan. Ma renunziar sin tut, gliez na saja betg la schliaziun. Uschia saja impurtant da puspè s’entupar e chantar communabel, ni forsa be da s’entupar, di il manader da la scola da musica Surselva.

Musicas n'han betg uschè bleras recumandaziuns

Las musicas da la Surselva han era survegnì posta da l’Uniun tetgala federala. Lezza ha fatg in flyer cun las recumandaziuns co sa depurtar. In punct impurtant è era da tegnair distanza. Uschia vegn recumandà da tegnair en direcziun ch’ins suna, dus meters e il vischin duai minimum esser in meter davent. Era vegn recumandà da mirar da betg derasar la spida dals instruments dapertut. Per la presidenta da la musica da Mustér Theres Burri Gadola è la gronda sfida la distanza. Els fetschian mintgatant in gieu da seser sper in auter vischin e quai saja gia ina gronda sfida. Ma seser e betg pli udir il vischin pervi da la distanza saja segir grev. Era stettian ins per regla fitg cumpact per tegnair il ritmus e udir bain in l’auter, e gist quai saja uss betg lubì. Ma la dunna sa legra fitg da puspè sunar e uschia da puspè s’entupar cun tuts, quai saja impurtant era per mantegnair la colliaziun tranter tuts.

RTR actualitad 08:00

Artitgels legids il pli savens