Siglir tar il cuntegn
cuntegn

Surselva Pur Tini Flepp ha sez vis il luf

A Valzeinza sut Mumpé-Tujetsch ha in luf stgarpà trais tschuts e blessà autras nursas. Ch'i sa tractia d'in luf haja il guardiaselvaschina Thomas Durschei confermà a l'Agentura da novitads rumantscha sin dumonda. Curt suenter ha il possessur da las nursas vis il luf en vischinanza da sia muntanera.

Legenda: Guardar il video Luf sin visita tar las nursas da Tini Flepp a Mompé-Tujetsch. Durada 04:44 minutas.
Or da Telesguard dals 10.05.2017.

Tenor il possessur dals animals, Tini Flepp da Mustér, èn trais tschuts vegnids mazzads ed ulteriuras nursas èn vegnidas blessadas. Quai è succedì la notg da dumengia sin glindesdi. La rotscha da 44 nursas e tschuts era dadens en ina saiv – in claus confurm a las directivas.

Intgins animals hajan pudì mitschar dal luf ord il claus ed èn scappads per part enfin en la Val da Cuoz ed a Sax. Sin dumonda da l’ANR ha il guardiaselvaschina Thomas Durschei da Mustér ditg, che tenor ses giuditgar saja quai stà in luf. Durschei ha prendì emprovas da DNA.

Luf fin 4 meters datiers a Flepp

Il glindesdi suentermezdi enturn las quatter, cura che Tini Flepp aveva gì finì sias lavurs vid il nov claus, haja el vis in toc sper il claus il luf. «Quel ha guardà intginas minutas ed è lura ì si vers la via» raquinta el vinavant. El haja lura vulì guardar nua ch’il luf giaja e saja ì cun l’auto plaunsieu da la via giu. Il luf haja s’avischinà sin var 4 fin 6 meters a l’auto e saja vegnì cun el a pèr 30 fin 40 meters.

Tini Flepp ha en tut 300 nursas. Var 40 tocs èn sut Mumpé-Tujetsch.
Legenda: Tini Flepp ha en tut 300 nursas. Var 40 tocs èn sut Mumpé-Tujetsch. RTR, Gion Hosang
Jau sto dir, quai è in bellezza animal. Sch’el laschass star las nursas avessan nus plaz tip top in sper l’auter.
Autur: Tini Flepppur da nursas, Mompé-Tujetsch
Il luf che Tini Flepp ha pudì observar en la vischinanza dal claus per sias nursas.
Legenda: Il luf che Tini Flepp ha pudì observar en la vischinanza dal claus per sias nursas. mad

Alpacas: La nova speranza

Per il cas ch’il luf avess anc ina giada da vegnir en la vischinanza ha Tini Flepp mess dus alpacas en il claus cun las nursas. Quels sajan fitg agressivs vers chauns ed el speria, ch’els sajan quai era envers in eventual luf. Dasperas fetschia el anc pli savens controllas e quai era la notg.

Saivs, glischs e bindels duain gidar a tegnair davent il luv.
Legenda: Saivs, glischs e bindels duain gidar a tegnair davent il luv. RTR, Gion Hosang

Las duas notgs passadas han dentant ils guardiaselvaschina surpiglià quella lavur. Els vulan medemamain persequitar il luf e ses cunfar. Cuntent è Tini Flepp era cun l’infurmaziun. Ils guardiaselvaschina infurmeschian adina uschè spert ch’els sappian ch’il luf saja en il conturn tut ils purs.

RR actualitad 14:00

Il viadi dal luf M75

Il viadi dal luf.
Legenda: RTR GRAFICA