Siglir tar il cuntegn

Header

cuntegn

Surselva Pur da Luven survegn raschun dal Tribunal federal

In pur da Luven che producescha forza electrica solara ha survegnì raschun avant Dretgira federala. Tenor lezza dastga el tscherner sez, tgi che mesira ses current. Quai scriva l'Agentura da novitads rumantscha.

audio
Bunura: Il Tribunal federal dat dretg ad in pur da Luven cun in’ovra solara
ord Actualitad dals 14.09.2017.
laschar ir. Durada: 1 minuta 21 Secundas.

Il pur sursilvan posseda trais indrizs fotovoltaics e vuleva tscherner sez il servetsch che mesira ses current. Fin uss han la Repower e la ElCom impedì quai. Gion Peder Vinzens e ses partenari han recurrì fin a Losanna e survegnì la fin finala raschun. Ils recurrents n'han uss pia da pajar nagina taxa e survegnan dals adversaris in'indemnisaziun da 2'000 francs.

Critica da Losanna

La Dretgira federala a Losanna ha dà raschun al pur cun l'argument ch'i regia en Svizra ina libertad economica. Lezza dastga be vegnir restrenschida sch'i exista ina clera basa legala. E quai na saja qua betg il cas.

Tgi dastga uss far la mesiraziun?

Cun quai turna il cas tar la cumissiun federala per electricitad la ElCom. Lezza sto decider, schebain il partenari dal pur ademplescha las cundiziuns e porscha ina mesiraziun qualitativamain auta che na periclitescha betg il manaschi da la rait.

Repower pudess era profitar

audio
Bunura: Mesiraziuns tar ovras solaras vegnan regladas da nov
ord Actualitad dals 14.09.2017.
laschar ir. Durada: 2 minutas 24 Secundas.

La Repower haja prendì enconuschientscha da la decisiun da la Dretgira federala, di Werner Steinmann, il pledader dal concern d’energia. Che producents gronds d’energia possian ussa tscherner sez la firma che fa las mesiraziuns, fetschia pli cumplitgada l’entira chaussa. Ins quintia però betg da perder blers clients, magari saja schizunt pussaivel da recaltgar novs clients, uschia Steinmann.

Interessant era per autras firmas

La firma Hassler Energia Alternativa SA da Ziràn beneventa las midadas. I dettia en il Grischun differentas ovras electricas cun pretschs fitg auts per far las mesiraziuns – quellas taxas na sajan savens betg giustifitgadas ha ditg Christ Andri Hassler, il manader da la fatschenta en la Val Schons. El è da l’opiniun ch'ovras solaras grondas pudessan daventar pli rentablas en l’avegnir, cun quai che las taxas per las mesiraziuns pudessan vegnir pli pitschnas. El beneventa questa pitschna liberalisaziun dal martgà d’energia. Sez na vegnia el betg a porscher mesiraziuns dal current, ina collavuraziun cun autras firmas sco la firma Swiss Metering vesa el sco buna soluziun.

Implant fotovoltaic

Co vesan ils custs per in implant fotovoltaic ora. Renda in implant fotovoltaic privat insumma? RTR fa in exempel cun ina chasa d'ina famiglia a Cuira.

video
Renda in implant fotovoltaic
Or da RTR dals 11.09.2017.
laschar ir. Durada: 1 minuta 25 Secundas.

RR novitads 08:00

Artitgels legids il pli savens