Punt Tavanasa: recaltgar ils daners

La fundaziun Nossa Punt è londervi da recaltgar ils daners per finanziar la sanaziun da la punt veglia a Tavanasa.

La punt da Versell a Tavanasa.

Legenda da maletgs: La fundaziun Nossa Punt quinta che la sanaziun custia 900'000 francs. RTR, G. Hosang

300’000 francs èn gia garantids dal chantun. Quai èn ils daners che l’Uffizi da construcziun bassa avess gì d’impunder per far giu la punt.

Sco il president da la fundaziun Nossa Punt, Sep Cathomas, ha ditg spetgan ins actualmain sin la resposta da la Protecziun da monuments dal Grischun. Tenor lescha po quella sustegnair tals objects cun ina summa 20 fin 35 pertschient dals custs imputabels.

Ultra da quai possia la fundaziun era quintar cun daners da la confederaziun. La punt saja era prendida si en l’inventari da las vias da communicaziun istoricas da la Svizra (IVS) declera Sep Cathomas. La confederaziun possia sustegnair cun 20 fin 45 pertschient. «Uschia vegnan ins tenor miu quint sin 800’000 fin 850’000 francs, per il rest stuain nus tschertgar sponsurs» di Sep Cathomas. La sanaziun vegn calculada cun bun 900’000 francs.

Cumenzar pir l’auter onn

Sch’igl è pussaivel vul la fundaziun realisar la sanaziun da la punt da Versell en ina etappa. Tenor Sep Cathomas spargnia quai custs e dettia suenter ruaus per decennis. Quest onn na vegn anc fatg nagut vid la punt. Ella vegn a servir per ils peduns e velocipedists sco colliaziun da Tavanasa cun Danis suenter che la punt nova vegn surdada al traffic questa stad. L’entschatta da l’auter onn vegnia laschà far las offertas per las lavurs e la primavaira duessan las lavurs cumenzar, sche tut va tenor plan.

Suenter la construcziun da la punt nova vuleva il chantun far giu la punt veglia. Encunter questa intenziun è dentant sa furmada opposiziun.

RR actualitad 12:00