Siglir tar il cuntegn

Header

cuntegn

Surselva Proxim pass per engrondir e sanar center da sport e cultura

Il cussegl da vischnanca da Mustér ha prendì enconuschientscha dal project per renovar ed engrondir il center da sport e cultura. Votà n’ha el dentant betg. Uss ha la suprastanza elavurà il messadi, uschia ch’il cussegl da vischnanca po decider la fin da mars e la populaziun lura ils 19 da matg.

L’interess per la sesida dal cussegl da vischnanca è stà gronds. Radund 40 persunas eran preschentas a l’emprima sesida sut il timun dal nov president dal cussegl Armin Berther. Suenter ch’il cussegl da vischnanca aveva refusà la stad passada l’emprima varianta dal project è la discussiun stada plitost magra. Sulet in cusseglier ha prendì il pled e ludà la preschentaziun ed il project sco bler pli equilibrà e madir.

audio
Mezdi: Project per renovar ed engrondir center da sport a Mustér
ord Actualitad dals 22.01.2019.
laschar ir. Durada: 3 minutas 37 Secundas.

Uschia po la suprastanza elavurar il messadi ed il cussegl da vischnanca decider ils 29 da mars en chaussa. Per la populaziun è planisada l’entschatta da matg ina orientaziun publica ed ils 19 da matg duai il pievel lura decider a l’urna. Quai sa chapescha sche tut va tenor plan, accentuescha Clemens Berther il president da la cumissiun center da sport e cultura.

Proxims pass: (sche tut va tenor plan)

Avrir la box Serrar la box
  • 18-02-2019 suprastanza tracta il messadi
  • 29-03-2019 cussegl da vischnanca tracta il messadi
  • entschatta matg – orientaziun per la populaziun
  • 19-05-2019 votaziun a l'urna

Dar paisa sin raiver

Il project è vegni midà en plirs puncts. Uschia èn las ventilaziuns ma era l’entrada sezza vegnida simplifitgada. Il spurtegl d’infurmaziun ch’era fin uss planisà ordadora la cafetaria duai vegnir integrà en quella ed uschia duai il manaschi da la cafetaria sco era quel da purschidas sco minigolf ni ulteriurs sports esser pussaivel da far cun sulet ina persuna, quai ha il manader dal center da sport e cultura Gion Hosang accentuà en sia preschentaziun. Gronda paisa vul il project nov dar al raiver. Uschia è planisà da engrondir la halla existenta da raiver, quai cun allontanar la galaria che saja in ristg da segirtad. Ulteriur duai dar ina halla da far il bouldern. Quai ina varianta da raiver che na basegna nagina suga per segirar e che po uschia vegnir pratitgada da famiglias cun uffants sco era da raividers pli versads.

Purschida duai vegnir augmentada

Il manader dal center da sport e cultura Gion Hosang ha fatg attent ch’il mument saja quai pussaivel da far 16 activitads sportivas en il center da sport e cun il project nov vegnia questa purschida augmentada. Era sajan localitads per champs cun bleras persunas fitg tschertgadas ed il center da sport e cultura porschia gist a tals champs ina purschida extraordinaria e en quella furma probabel unica, ha accentuà Hosang.

Summa d’investiziun resta tuttina

La summa per l’entir project resta tar 15,1 milliuns francs. Planisada è era in cundriz da fotovoltaica sin tetg dal center. En tut han 5 interpresas inoltrà ina offerta. Il manader da la fundaziun per la perscrutaziun d’energia (AlpEnForCe) Ivo Schillig ha preschentà las variantas ed fatg attent sin avantatgs sco era dischavantatgs da las singulas offertas. Ma ina ovra da tala dimensiun saja ecologicamain da grond niz e quella vegnia era da generar in gudogn ni almain da purtar sasezza. Era interessant saja da duvrar en il center l’energia producida, ma il problem saja che l’enviern vegnia produci damain energia e gist lura vegnia duvrà dapli en il center da sport e cultura.

RR novitads 06:00

Artitgels legids il pli savens