Prolog da la «Rallye Gotthard 2017» a Sedrun

Davent da 1972 enfin 1983 è la «Int. Rallye Gotthard» vegnida manada tras 10 giadas. L’onn 2017 duai ella vegnir reactivada.

Laschar ir video «La «Int. Rallye Gotthard» duai vegnir reactivada il 2017»

La «Int. Rallye Gotthard» duai vegnir reactivada il 2017

3:03 min, Telesguard dals 5.9.2016

La «Int. Rallye Gotthard» era la suletta rallye da la Svizra tudestga e manava ils automobilists tras parts dal chantun Uri, tras la Leventina superiura ed en la val Tujetsch. L’onn 2017, suenter ina pausa da 34 onns, duai avair lieu la 11avla ediziun da la rallye. Per far reclama per quella rallye han ils organisaturs clamà possessurs dad autos da rallye vegls ad in gir dad Andermatt enfin a Sedrun ed enavos.

Rallye uriundamain gia planisada per 2016

Atgnamain era la rallye gia planisada quest onn. Il comité d'organisaziun n’ha dentant betg survegnì ad uras tut las lubientschas necessarias per las parts da la rallye en la Leventina superiura. Las lubientschas dal Grischun e da l’Uri eran però gia avant maun.

Uschia han els decidì dad almain organisar in gir cun vegls autos da rallye per engraziar a las vischnancas Andermatt e Tujetsch per la buna collavuraziun.

Laschar ir video «Impressiuns da Tujetsch dal prolog da la Rallye Gotthard»

Impressiuns da Tujetsch dal prolog da la Rallye Gotthard

1:52 min, dals 3.9.2016

Parts da la ruta da la rallye

Sur 40 autos da rallye dals onns 1912 enfin 1995 èn charrads sur il pass Alpsu enfin Rueras. A Rueras han els bandunà la via principala ed èn ids sin vias lateralas a Surrein e vinavant a Sedrun.

Là ha la gruppa fatg ina pausa e preschentà ils autos al public. Sur Milez èn els lura puspè ids enavos ad Andermatt. Quai è ina ruta che vegn per part era duvrada il proxim onn per la rallye.

In gir pacific

Il gir n’è betg stà annunzià sco cursa, perquai han ils participants stuì sa tegnair vi da la lescha davart il traffic sin via. Dapli che 80km/h n’eran pia betg lubids.

Tuttina ha il gir dà ina pitschna impressiun, co la rallye dal proxim onn savess vesair ora. Lura na vegnan betg sulettamain vegls autos da rallye a charrar sin las vias enturn Sedrun. Planisà è ina rallye cun autos da rallye moderns.

RR actualitad 08:00

Prolog Rallye Gotthard 2017