Tenor la lescha chantunala da sanadad èn las vischnancas responsablas per il bainstar e la sanadad da las senioras e seniors en vischnanca. Quai è stà la raschun che la vischnanca da Mustér ha realisà cun sustegn da la Pro Senectute dal Grischun in project per promover la qualitad da viver per seniors en la vischnanca. Cumenzà ha quai cun ina conferenza per il futur il matg passà. A questa emprima scuntrada han las senioras ed ils seniors rimnà tut las purschidas ch’èn gia avant maun en vischnanca ed ils giavischs per ulteriuras purschidas. Ussa, mez onn pli tard, han gruppas da lavur ch’èn s’occupadas cun differents temas preschentà a var 50 seniors il resultat da lur ponderaziuns. In pitschen dumber sch’ins ponderescha che passa 600 abitants da la vischnanca da Mustér èn sur 60 onns. Sco la suprastanta da la vischnanca da Mustér, Cecilia Maissen, ha dentant ditg, na saja ella betg trumpada da quest dumber. «Pli gugent 50 ch’en cun corp ed olma da la partida empè da blers che han be da crititgar» ha ella manegià.
Quatter projects concrets
In project duai promover l’engaschi voluntari per tgirar contacts tranter ils seniors ed evitar che quels sajan persuls e bandunads. L’idea è che seniors voluntarias fan visitas u interprendan insatge cun auters seniors. In’auter project prevesa che seniors che basegnan in transport tar il medi, per far cumissiun euv. pon annunziar ils basegns da transport ed auters seniors fan quest servetsch cun lur agen auto. Era èsi stà giavischà dapli occurrenzas per las senioras ed ils seniors. Da questas è in autra gruppa s’occupada. La finala hai dà in catalog cun differents temas ed ideas per occurrenzas. Ils preschents han lura pudì inditgar tge ch’interessescha. La medema gruppa è lura era stada responsabla per chattar in lieu ideal per s’entupar. Chattà talas stanzas han ins en la chasa da tgira PUNTREIS ed en la scola a Segnas. Ils inscunters duain esser mintga 15 dis ed esser cumplementars e na betg concurrenzar las purschidas existentas.
Post da coordinaziun
Il quart project ch’è vegnì preschentà è in post da coordinaziun per las occurrenzas dals seniors en vischnanca. Quai tranter auter per administrar e publitgar las occurrenzas mo era prender encunter las annunzias. Sco la suprastanta da la vischnanca da Mustér, Cecilia Maissen ha ditg, saja quai in post cun in pensum da lavur da 3 fin 4 uras lavur per emna. Anc n’è betg cler tgi che finanziescha quest post a lunga vista. A l’entschatta derivian ils daners dad ina fundaziun. La plazza vegn scritta ora cun in carnet da duairs. Il post duai era esser ina collavuraziun cun la Pro Senectute Glion. Ina giada per mais duai quai era dar in servetsch da cussegliaziun per seniors per fatgs giuridicas u da finanzas.
L’emprima occurrenza culturala che vegn organisada è tenor Cecilia Maissen il schaner. Tge tema che quella ha, n’è anc betg cler. Quai vegn a sa dar or dals resuns ch’èn vegnids rimnads a chaschun da la preschentaziun. Quels resuns vegnan ussa analisads ed ils projects sviluppads vinavant.