Primavaira avant in onn ha il chantun refusà la dumonda da la vischnanca da Falera d'engrondir la zona da bajegiar per indigens, ina zona che porscha anc plaz per trais chasas d’ina famiglia.
Il chantun ha pretendì, che Falera stoppia emprim nizzegiar las zonas da bajegiar existentas en il vitg, avant ch’el lubeschia d’engrondir la zona per indigens a l'ur dal vitg. Sin quai ha la suprastanza da Falera reagì e preschenta uss in project per ina surbajegiada cun abitaziuns per indigens.
17 milliuns francs
Planisà è ina surbajegiada cun 3 chasas e total 27 abitaziuns da 2,5 enfin 4,5 stanzas. Ils custs totals muntan a ca. 17 milliuns francs. Las 4 parcellas pertutgadas appartegnan a la vischnanca politica, a la vischnanca burgaisa ed a la plaiv da Falera.
Tenor il president communal Wendelin Casutt sustegnian las suprastanzas da la vischnanca burgaisa e da la plaiv il project. Uss stoppia il project vegnir preschentà a la populaziun, era per sentir sche l' interess è insumma avant maun da cumprar abitaziuns.
Abitaziuns enstagl da chasas
Cun quella surbajegiada avess Falera a disposiziun in grond dumber d’abitaziuns per indigens, e betg dapli plaz per chasas d’ina famiglia, sco l’engrondiment da la zona da bajegiar per indigens avess purtà. Per Wendelin Casutt è quai giavischà, cunquai che la suprastanza quinta, che la dumonda suenter abitaziuns a Falera vegn a crescher en l’avegnir.
Per l'ina dettia quai la pussaivladad, che geniturs possian surdar lur chasas als uffants (cun famiglias) e tuttina restar a Falera cun cumprar ina da quellas abitaziuns. Per l’autra vesa el la schanza, che persunas che lavurian a Cuira ubain en la regiun da Cuira vegnian a star a Falera. La finala sajan ins cun auto en 20 minutas a Cuira, ed in tal viadi da lavur saja ozendi normal.
RR actualitad 08:00