Cun il project «incubatur turistic» vul il program San Gottardo sustegnair ideas innovativas en las regiuns Surselva, Goms, Bellinzona e Valli ed en il chantun Uri. Ins veglia porscher maun a tuts che hajan ina tala idea, tant a persunas gia uss involvidas en il turissem sco era ad amaturs, uschia Dieter Bogner dal program San Gottardo.
Ideas pon ins inoltrar fin ils 15 da zercladur. Ils projects che vegnan alura selecziunads, survegnan durant in mez onn sustegn cun in coaching professiunal. La finamira dal «incubatur» è da sviluppar, elavurar e lura era metter en la pratica las ideas uschè spert sco pussaivel, senza stuair far gronds studis davart la realisabladad u plans da business. La finala survegn il project cun las pli grondas schanzas in sustegn da 5’000 francs dal program San Gottardo, sco agid da start.
Sustegn finanzial betg exnum da San Gottardo
Ils projects na vegnian betg exnum finanziads dal Program San Gottardo. Sulet sch’i haja in'influenza sin pliras regiuns, alura pudess era in tal project vegnir sustegnì, ha ditg Dieter Bogner. Ma quai na saja betg ina premissa per inoltrar in’idea, qua possia propi mintgin era cun in'idea fitg locala prender part. Els sperian fitg che plirs projects vegnan uss inoltrads, era en la Surselva. En las ulteriuras regiuns, sco per exempel en il Tessin, sajan projects avant maun, ma be sche mintga regiun haja almain in project, vegnia l’incubatur turistic era realisads. Ma els quintian ferm cun annunzias, la finala hajan ins uss anc quasi in mais temp, uschia Dieter Bogner.