Siglir tar il cuntegn
Inhalt

Surselva Producir sez l'energia ch'ins dovra

La fatschenta Tarcisi Maissen SA a Trun ha installà sin tut ses tetgs var 3'700 m² cellas solaras. Quai è l'indriz cun la quart gronda surfatscha en il Grischun (datas da 2016).

Curdin Maissen en la stanza nua ch'ils transfurmaturs èn installads.
Legenda: Curdin Maissen en la stanza nua ch'ils transfurmaturs èn installads. RTR, Gion Hosang

Producir l'atgna energia cumplettescha la filosofia da fatschenta da lavurar cun products regiunals, declera Curdin Maissen, in dals mainafatschentas.

Producziun da 580'000 kw/h

Cun ses indriz solar possia la fatschenta Tarcisi Maissen SA producir 580’000 kw/h electricitad. Quai tanschia per 120 chasadas e saja dapli che quai ch’il manaschi sez dovria. En tut dovran els 250’000 kw/h. 110’000 kw/h pon els gist duvrar directamain or da l’atgna producziun cun las cellas solaras. L’energia surora vegn vendida. Ed ils muments che l’indriz na producescha betg avunda, vegn cumprà energia or da la rait d’energia.

Far energia e gist anc spargnar cuvrida dal tetg

Las investiziuns da metter sin ils tetgs da la fatschenta cellas solaras sa pajan. Er il sentiment da pudair producir l’energia ch’ins dovria saja bun. Dentant er la clientella apprezieschia quai, declera Curdin Maissen.

El è persvas, che cunzunt sch’ins construeschia da nov in bajetg – u fetschia da nov in tetg, valia quai la paina da far la ponderaziun da far in tetg da solar. Pertge lura possian ins era tut tenor far la cuvrida cun cellas solaras empè da sturs, tievlas u in auter material.

RR actualitad 07:20