Siglir tar il cuntegn
Inhalt

Surselva Processiun mo per dunnas ed uffants

Prest 400 onns èsi uschia che las dunnas ed ils uffants fan la processiun da S. Roc a Segnas ed ils umens ston spetgar.

Legende: Video La processiun da S. Roc a Segnas. abspielen. Laufzeit 05:04 Minuten.
Or da Actualitad video dals 23.08.2015.

Sogn Roc è di da perdunanza per Segnas, in aclaun da Mustér. Igl è numnadamain in da lur patruns baselgia. Quest di vegn tradiziunalmain fatg ina processiun. A questa processiun van dentant be las dunnas ed ils uffants. Sco Gion Tenner ch’è ugau-baselgia da Segnas raquinta, supponan ins che questa tradiziun deriva dal temp da la pesta (muria).

Ils onns 1936 e 37 ha la pesta numnadamain era chaschunà a Segnas per bleras baras. L’avat da Mustér haja lura supplitgà il plevon da far ina processiun cun uffants. Gion Tenner che ha retschertgà in pau davart quest tema, di che quai eri da quest temp in pau moda. «Forsa vegniva pensà ch’ils uffants sajan innocents e vegnian d’implorar meglier quests sontgs per agid». In’autra legenda che vegn raquintada è che tut ils umens eran morts uschia che be uffants e dunnas hajan pudì far la processiun. La legenda raquinta era ch’ils da Segnas n’hajan in onn betg fatg la processiun e lura hajan ils zains da la baselgia sunà tut sulets.

Entant che persunas pli veglias pon raquintar da 70 uffants che faschevan antruras la processiun èsi ussa fitg paucs. Malgrà quai vegn la tradiziun mantegnida. Er sch’i duvrass en il futur forsa agid dals umens n’èn betg tuts segirs che lez laschassan persvader da far la processiun.