Enfin ussa n’eri betg pussaivel da siglientar lavinas en la regiun dad Acquacalda, perquai ch’i sa tracta d’in territori da protecziun da la natira. Sco quai ch’il president da la Pro Lucmagn, Peter Binz ha ditg, hajan ins pudì argumentà quai giavisch tar il chantun Tessin, cun il fatg che la lavina vegn uschia ni uschia intginas giadas per enviern e che quai na midia nagut sch’ella vegn siglientada u sch’ella vegn da sezza. Cun questa mesira quintan ins da pudair tegnair avert il pass dapli dis durant l’enviern.
Candinas è nov president
Era en il nord vesi ora bain. Il chantun Grischun saja londervi d’examinar la prolungaziun da la galaria dal Scopi per rodund 350 meters. Questa galaria vegn sanada il 2017 fin 2021 ed ina eventuala prolungaziun da la galaria vegniss fatga en quest connex. Era quai augmentass il dumber da dis ch’il pass po esser avert.
A la radunanza da l’Uniun Pro Lucmagn è era vegnì elegì in nov president. Peter Binz ha decidì da reducir in pau ses engaschis e betg da star a disposiziun per ina ulteriura perioda d’uffizi da 3 onns. Sco ses successur è vegnì elegi Martin Candinas. Ultra da quai è era Ursula Dandrea betg stada vinavant en suprastanza. Per ella è Christian Bernasconi, il directur dal center da la Pro Natura Lucomagno vegnì elegì.
RR novitads 10:00