Siglir tar il cuntegn
Inhalt

Surselva Primavaira – il temp per rumir

La primavaira è per blers il temp da dismetter il vegl e far plaz per nov, bunamain ina tradiziun. E perquai è la primavaira era la stagiun auta per las deponias da rument.

Sin ils culms hai anc massa naiv e plirs pass na pon anc ditg betg vegnir averts. En il funs da las valladas Grischunas è la naiv dentant per gronda part luada e la primavaira sa derasa. Era ils carstgauns sentan quella nova vita ed entschaivan plain energia a far urden a chasa. La primavaira è per blers il temp da dismetter il vegl e far plaz per novas chaussas, bunamain ina tradiziun. E perquai è la primavaira era la stagiun auta per las deponias da rument. Per exempel era per la deponia Plaun Grond, la deponia da la Regiun Surselva a Rueun.

Betg dapli persunal che usità

Tenor il substitut dal manader da la deponia, Eligius Spescha, datti cler dapli lavur la primavaira che durant il rest da l'onn. Cunzunt la sonda è in dals dis preferids per purtar rument en la deponia. Tuttina na dovria betg dapli persunal quels dis. La deponia saja bain organisada e funcziunia senza problems.