Siglir tar il cuntegn
Inhalt

Surselva Prim directur da turissem per Flem Laax Falera

André Gisler daventa nov directur da turissem da Flem Laax Falera. Sco la Flem Laax Falera Management SA communitgescha, surpiglia Gisler en l'avegnir la gestiun operativa da l'organisaziun turistica ensemen cun il nov cussegl d'administraziun.

André Gisler.
Legenda: Gisler è era responsabel per il svilup da champs da fatschenta per la stad. Flims Laax Falera

Uschia vegnia garantì ch'in post central tegnia en egl ils interess da l'entira regiun da vacanzas. Projects da svilup duain vegnir iniziads cun plirs differents acturs. Sco quai che la destinaziun scriva, saja Gisler in turisticher cumprovà cun passa 10 onns experientscha da manar. Cun il consentiment da ses patrun possia Gisler cumenzar successivamain ses nov pensum e lavurar cumplainamain sco directur da turissem a partir dal prim da november 2015.

Emprim directur

El è l'emprim directur da la Flem Laax Falera management SA. Sco il president da la societad Christian Laesser di, saja quai stà necessari, perquai che fin uss haja il cussegl d'administraziun stuì far la lavur operativa.

En l'avegnir stoppia André Gisler sviluppar surtut il turissem da stad, mo era crear meglieras cundiziuns per ils proprietaris d'abitaziuns secundaras. In partenari ferm ed impurtant saja l'Arena Alva. Ins drovia in l'auter en il turissem.

RR novitads 14:00