Siglir tar il cuntegn

Header

Navigaziun

Esther Hendry ed Aluis Hosang
Legenda: Esther Hendry ed Aluis Hosang RTR, H. Giger
cuntegn

Surselva Premi Desertina per Aluis Hosang e Movis

Ier saira – a chaschun da la seduta constitutiva dal cussegl da vischnanca da Mustér – han ina persuna privata ed ina gruppa dastgà retschaiver quel.

Onur per in dirigent ed ina gruppa da saut

Aluis Hosang è vegnì undrà cun il premi da renconuschientscha (dotà cun 3'000 francs). Quai per ses merits sco dirigent da la societad da musica da Mustér e sco dirigent dal chor baselgia s. Gions Mustér.
Esther Hendry, inizianta da Movis, la gruppa da saut e moviment, ha retschavì il premi da promoziun (dotà cun 2'000 francs). En questa gruppa cun 11 manadras èn 110 sautunzas e sautunzs da 7 fin 50 onns.

Cumenzar cun insatge positiv

Il Premi Desertina undrescha persunas privatas sco era instituziuns ed organisaziuns che s’engaschan a moda extraordinaria per cultura e sport. L’ultima giada è el vegnì surdà 2010. Sco nova suprastanza hajan els vulì cumenzar cun insatge positiv, di il president communal Robert Cajacob. Els veglian cuntinuar e surdar – sche pussaivel – mintga dus onns il Premi Desertina.

Christoph Berger nov president dal cussegl da vischnanca

Victor Flepp, Clemens Berther, Iris Lombris, Robert Cajacob, Christoph Berger, Iso Mazzetta (da sanester).
Legenda: Victor Flepp, Clemens Berther, Iris Lombris, Robert Cajacob, Christoph Berger ed Iso Mazzetta (da sanester). RTR, H. Giger

Avant (a la seduta constitutiva) è il nov president communal sco era il cussegl da vischnanca vegnì saramentà. Nov president dal cussegl per 2017 è Christoph Berger, vicepresident è Armin Manetsch, actuar è Paul Duff e nov vicepresident communal (2017-2020) Iso Mazzetta.
Era la suprastanza nova è stada preschenta cun il president Robert Cajacob, Iris Lombris, Victor Flepp, Clemens Berther (ils novs) ed Iso Mazzetta.

RR actualitad 08:00