Politica duai prender serius possessurs d’abitaziuns secundaras

Possessurs d’abitaziuns secundaras da Breil vulan in’uniun che represchenta lur interess vers la politica communala.

Possessurs d'abitaziuns secundaras e simpatisants a Breil.

Legenda da maletgs: L'interess è stà grond. Tenor ils iniziants èn dapli glieud che spetgà stads preschents. RTR, G. Hosang

Il tenor tar las var 70 persunas preschentas a Breil la sonda passada è stà cler: «Uschia betg, betg cun nus!» Perquai han els surdà als iniziants Ignaz Derungs, Giusep Caduff e Kurz Frei l'incumbensa da fundar la Cuminanza d'interess da possessurs da secundas abitaziuns Breil e conturn.

Per Ignaz Derungs che duai surpigliar il presidi èsi cler tge finamira ch’è la pli principala: «Nus vulain che las autoritads communalas prendan serius nus.» Fin ussa haja la suprastanza communala da Breil gì il sentiment che pervia da talas persunas che reclomian, na stoppian ins far nagut. La situaziun mussia dentant ch’i giaja ina lavina tras la Surselva. Davent da Mustér fin a Flem vegnia fundà talas uniuns che represchentian ils interess dals possessurs da segundas abitaziuns vers las autoritads communalas e che veglian sa dustar, declera Ignaz Derungs.

Passa 200 commembers

L’uniun duai unir ils possessurs d’abitaziuns secundaras e dar ad els ina ferma vusch. Ella duai uschia esser il partenari per las autoritads. Ins vegli far igl emprim pass e tschertgar il contact cun las autoritads per pudair sa discutar. Era vul la cuminanza d’interess dapli transparenza. Ins veglia savair nua ch’ils daners giajan e tge che vegnia purschì als possessurs d’abitaziuns secundaras.

Giusep Caduff, Ignaz Derungs e Kurt Frei (da sanester

Legenda da maletgs: Inizants e gist emprims suprastants: Giusep Caduff, Ignaz Derungs e Kurt Frei (da sanester). RTR, G. Hosang

La finala pajan els taglia sin giaschom en vischnanca ed ussa anc bler pli autas taxas da turissem. Las taxas sco talas vegnan era messas en dumonda. Uschia è era la finamira da sbassar las taxas u schizunt ir enavos tar il sistem vegl. «Schliar las taxas n’è probabel strusch pussaivel. Mo jau sper che las autoritads sajan prudentas e vesan ch’i ston reducir las taxas» di Ignaz Derungs. Forsa sajan els schon in zichel illusorics. «Mo cun far nagut, na vegn ins da midar nagut». La finamira è d’avair fin la fin da l’onn 200 commembers. Tenor Ignaz Derungs na restia quai nagut auter a las autoritads communalas da prender serius ils possessurs d’abitaziuns secundaras.