La colliaziun d’internet eria a Danis-Tavanasa fitg schletta, di il president communal da Breil Clau Schlosser. El è fitg cuntent che quai è ussa sa midà. A Danis-Tavanasa porscha la Swisscom ussa ina spertadad d'internet da fin maximal 100 Mbits/s. Quant ch'igl è propi, dependa da la distanza dal repartider dal signal. Cunzunt per la scola n’era l’internet prest betg da duvrar, declera Clau Schlosser. Senza daventar sez activ n’è quai dentant betg stà pussaivel. «In zichel vain nus stuì far squitsch e cun agid da Martin Candinas ed il consuprastant Pius Monn ha quai lura funcziunà».
Ina buna rait d’internet è ina schanza
Il cusseglier naziunal Martin Candinas ch’è era stà preschent, ha manegià ch’el na saja betg quel che procuria per tut las vischnancas per raits spertas d’internet. «Sch’i dat dentant problems en secturs nua ch’ins ha contacts e nua ch’ins sesa anc gist en la cumissiun lura sa gid jau tenor pussaivladad. Quai è l’obligaziun d’in politicher regiunal.» Martin Candinas s’engascha era en la cumissiun da traffic e telecommunicaziun ch’i na dettia betg ina foss digital tranter las regiuns urbanas e las regiuns periferas. Bunas colliaziuns d’internet sajan era ina schanza per las regiuns periferas sco la Surselva. Uschia possia forsa l’ina u l’autra abitaziun secundara vegnir transfurmada en ina abitaziun primara. Quai sch’il possessur po lavurar intgins dis en ses lieu da vacanzas ed intgins en la bassa. Perquai dovria quai dentant bunas colliaziuns d’internet.
Ulteriurs lieus
Da vart da la Swisscom èn ins conscient da la responsabladad che la fatschenta porta per las regiuns periferas, ha il pledader da medias Armin Schädeli ditg a Radiotelevisiun Svizra Rumantscha. Per la Swisscom saja quai impurtant ch'era quellas regiuns vegnian resguardadas, independent dal dumber d'utilisaders. «Il pli gugent purschessan nus en tut las vischnancas internet ultra-spert». I saja dentant era in dumonda da l’engaschi da las vischnanca. La Swisscom saja averta per in dialog cun las vischnancas di Armin Schädeli vinavant.
Mintg'onn bajegia la Swisscom ora la rait da 30 fin 40 vischnancas. Quai sajan investiziuns da 1,7 milliardas francs per onn, di Armin Schädeli. Per la Surselva munta quai ch'i vegn quest onn anc bajegià ora la rait u almain cumenzà cun quella lavur en ulteriurs 15 lieus.