Siglir tar il cuntegn
cuntegn

Surselva Plevon arrestà, Tujetsch inquietà

Il Tuatschins n'en betg cuntents cun la moda d'infurmar da l'uvestgieu e da la plaiv.

  • Il plevon da Tujetsch è en arrest d'inquisiziun dapi mardi avant Tschuncaisma. Quai ha la procura publica confermà.
  • L'uvestgieu da Cuira ha denunzià el pervì d'in indizi d'in act chastiabel supponì cunter l'integritad sexuala d'ina persuna creschida.
  • Per l'accusà vala la presumziun d'innocenza.

La novitad che il plevon da Tujetsch è vegnì arrestà il mardi avant Tschuncaisma, è sta ina surpraisa per la populaziun da Tujetsch. Che els n'èn betg vegnids orientads ord lur atgnas retschas mabain da las medias da la arrestaziun ha fatg surstar il Tuatschins.

Il vicari general aveva laschar preleger en baselgia sur Tschuncaisma, che els hajan visà la plazza al plevon. Sco quai che Arthur Caduff, il president da la plaiv di, n'eran els betg orientads ch'il plevon saja vegnì arrestà. Ed era ussa n'hajan els betg dapli infurmaziuns.

La posiziun dal responsabel per medias e communicaziun da l'uvestgieu Giuseppe Gracia.
Legenda: La posiziun dal responsabel per medias e communicaziun da l'uvestgieu Giuseppe Gracia. Grafica RTR

Sco l'uvestgieu scriva sin sia pagina d'internet saja la denunzia penala vegnida fatga suenter in indizi d’in act chastiabel supponì cunter l'integritat sexuala d'ina persuna creschida.

«Restai quiets»

Che la populaziun saja inquietada, per quai haja el chapientscha, uschia Arthur Caduff. El sappia però garantir che la craisma na saja betg periclitada, pervi da quest cas. El appellescha als Tuatschins d'avair pazienza e betg far speculaziuns.

Ins na sappia gea anc betg da tge cas ch'i sa tracta. Ha tut quai insumma da far insatge cun Tujetsch u èsi chassas ch'il plevon ha eventualmain commess gia pli baud, en Germania? E la finala vala anc adina la presumziun d’innocenza.

RR novitads 11:00