Siglir tar il cuntegn
cuntegn

Surselva Plazzal da la via chantunala a Schluein è in grond impediment

Il plazzal 2'300 sin la via chantunala H19 amez il vitg da Schluein è la culpa da bleras discussiuns tar automobilists e chauffeurs da camiun. Il traffic po mo vegnir manà sin in vial tras il plazzal. Quai chaschuna lungas colonnas.

Il plazzal da la via chantunala a Schluein.
Legenda: Il plazzal da la via chantunala a Schluein. RTR, C. Albin

Durant temps da bler traffic pon las colonnas da mintga vart dal plazzal esser pli che 1 km lungas. L’Uffizi da construcziun bassa ha quintà cun bler traffic en quai lieu, dentant betg gist tant.

Il plazzal sa chatta amez la vart dretga dal vitg da Schluein.
Legenda: Il plazzal sa chatta amez la vart dretga dal vitg da Schluein. charta: gr.ch / grafica RTR

En media 6’000 vehichels per di

Tenor mesiraziuns da l’uffizi charreschan en media circa 6'000 vehichels per di tras Schluein. Repartids egual sin l’entir di fissan quai dapli che quatter vehichels per minuta, senza pausa, di e notg. Il traffic sa concentrescha dentant sin la damaun, da mezdi e la saira, e durant quai temp datti tenor Marcus Valaulta da l’Uffizi da construcziun bassa las lungas colonnas da spetga.

In fatg che na fa betg pli simpla la chaussa è, ch'il vial ch'è dà liber per il traffic è per gronda part via natirala. Perquai charreschian intgins automobilists pli plaun ed uschia cuzzi in lung temp enfin che tut ils vehichels hajan traversà il plazzal.

Sviament betg pussibel

Sviar tut il traffic sin vias communalas enturn il plazzal n'è betg pussibel. Las vias che vegnissan en dumonda sajan memia stretgas u betg adattadas per camiuns. E sparter il traffic, vul dir laschar ir ils camiuns atras il plazzal e manar mo autos da persunas sin las vias communalas enturn il plazzal saja memia cumplitgà. Tenor Marcus Valaulta na datti betg alternativas e tut il traffic stoppia vegnir manà sin mo in vial atras il plazzal.

Marcus Valaulta, il manader dal district Glion da l'Uffizi da construcziun bassa.
Legenda: Marcus Valaulta, il manader dal district Glion da l'Uffizi da construcziun bassa. RTR, C. Albin

Las lavurs vi da quai tschancun da la via chantunala cuzzan anc enfin mez settember. La stad, davent da mez fanadur enfin ca. mez avust , vegn dentant betg lavurà e durant quai temp duessan omadus vials da la via chantunala tras Schluein esser averts.

RR actualitad 08:00