Siglir tar il cuntegn
Inhalt

Surselva Plazza da scola Mustér: Allontanar quai ch’è malsegir

La plazza da scola a Mustér duai en in emprim pass daventar pli segira. Quai dat temp da far ponderaziuns co ella duai vesair ora en l'avegnir.

Sin il il plaz scola a Mustér vegn actualmain stgavà bravamain per far giu mirs e stgalas.
Legenda: Sin il il plaz scola a Mustér vegn actualmain stgavà bravamain per far giu mirs e stgalas. RTR, G. Hosang

La plazza da scola da Mustér è vegnida construida avant prest 40 onns cun bleras stgalas ed auts mirs. Ozendi na correspunda ella absolutamain betg pli a las normas actualas.

Moziun d'adattar la plazza pendenta dapi il 2015

Quai era gia vegnì constatà en ina moziun dal cussegl da vischnanca il 2015. Quella aveva pretendì da la suprastanza communala da far ponderaziuns co midar quai uschia ch'il plaz daventa pli segir. La moziun è restada pendenta. Tranter auter era perquai ch'ins vuleva cumbinar questas lavurs cun las lavurs da sanaziun da la scola nova.

Spustà sanaziun da la scola nova

La nova suprastanza ch'è en uffizi dapi l'entschatta da l'onn è anc ina giada ida sur ils cudeschs ed ha la finala decidì da spustar la sanaziun da la scola. I dettia auters projects che hajan pli gronda prioritad e las finanzas da la vischnanca na sajan betg las meglras, ha il president communal Robert Cajacob ditg.

Tar la scola sa tractia quai oravant tut d'ina sanaziun energetica e quai n'haja betg in effect negativ sin il manaschi da scola.

Ils mirs e las stgalas èn davent ed i vegn gulivà il plaz.
Legenda: Ils mirs e las stgalas èn davent ed i vegn gulivà il plaz. RTR, Gion Hosang

Investir be il pli necessari per augmentar segirtad

Cun il plaz da scola na possian ins dentant betg spetgar. Ils mirs ch'èn per part fin dus meters auts e senza tschabargals, las stgalas che sajan donnegiadas ed hajan chantas gitas sajan privlusas per ils uffants. Perquai haja la suprastanza stuì reagir, ha ditg Robert Cajacob.

Ella haja decidì in credit da 40'000 francs per allontanar stgalas e mirs nua che quai è pussaivel uschia che la segirtad saja puspè dada. Durant l'enviern vegn quai lura probabel fatg ponderaziuns co furmar da nov il plaz. Perquai vegn ussa investì en las lavurs las pli necessarias che n'impedeschian betg las novas ideas.

RR actualitad 07:00