Siglir tar il cuntegn
Inhalt

Surselva Plantar «aur cotschen» empè da far vacanzas

Ils giasts da vacanzas Urs Durrer e Sandra Durrer han racoltà a Sagogn radund 100 grams «aur cotschen», sco il safran vegn era numnà pervia da sia colur e sia valur. Quai na fa Urs Durrer dentant betg da professiun, na, plantar safran è per el program da vacanzas.

Legende: Video Safran da Sagogn abspielen. Laufzeit 04:07 Minuten.
Or da Telesguard dals 19.10.2017.

Per ils ins munta far vacanzas prender patgific e giudair il «dolce far niente». Ils auters dovran era durant las vacanzas in’occupaziun. Tar els tutgan er Urs e Sandra Durrer. A Sagogn sper lur chasa da vacanzas han ils dus giasts da la Sursilvania cumenzà cun ina pitschna plantascha da safran.

Safran da Sagogn – in’idea absurda?

Avant quatter onns han Urs e Sandra Durrer chattà bulbas da safran en in center d’orticultura. Plain marveglias han els plantà las bulbas a chasa ed han gì success. Cura ch’els han cumprà a Sagogn ina chasa da vacanzas, han els plantà las bulbas sin dus prads avant la chasa. Ditg e fatg, l’emprim onn han els gia cultivà 2’500 bulbas da safran a Sagogn.

25’000 bulbas dattan 100 grams fils da safran

L’emprova è gartegiada,ed uschia han els plantà il segund onn gia 6’000 bulbas da safran, bulbas che sumeglian a pitschnas tschagulas. Quest onn han els anc ina giada augmentà il dumber per 15’000 bulbas. Urs Durrer quinta cun ina racolta da circa 100 grams fils da safran il 2017. Cunquai ch’il safran sa multiplitgescha en il terren duai dar l'onn 2018 gia 200 grams.

Durant trais emnas d’october flurescha il safran. Di per di s'avran tranter 500 e 1'500 novas fluras. Quellas ston Urs e Sandra Durrer anc racoltar il medem di. Per quella lavur a maun èn els visads vi sin agid da vischins e vischinas.

Quest onn dat quai 100 grams fils da safran. In gram custa 78 francs e basta per 60 risotti. Il safran da Sagogn è tschertgà, la mesadad da la racolta è gia reservada.

Las flurs da safran rimnadas durant in di.
Legenda: Las flurs da safran rimnadas durant in di. RTR, Telesguard

Pudair viver da safran è in siemi

Viver sco pur da safran è in siemi da Urs Durrer. Cun las quantitads racoltadas na saja quai dentant betg pussibel. El haja quintà ina giada, ch’el stoppia vender la racolta d’in onn e mez per pudair pajar la pitschna maschina d’arar e las bulbas da safran ch’el haja cumprà.

Las uras passentadas sin l’er per plantar, zerclar e racoltar ils fils da safran na sajan betg anc resguardadas en quai quint. Il safran restia in hobi. Sco auters legian in cudesch durant lur temp liber, giajan els simplamain gugent sin il prà a tgirar il safran.

RR actualitad 12:00