Siglir tar il cuntegn
Inhalt

Surselva Plans per la pendiculara da Cassons vegnan mess sin il chau

Da la pendiculara futuristica da Flem a Cassons vegn sco emprim realisada la part sisum – da Nagens a Cassons.

Reto Gurtner davant la tribuna, durant la preschentaziun a Flem.
Legenda: Reto Gurtner emprova da persvader ils da Flem ch'i va era cun entschaiver sisum. RTR, Linus Livers
Carta geografica Flem Nagens Cassons.
Legenda: La part speziala per ils visitaders en la part sisum. RTR, Grafica

La part dal vitg da Flem fin si Nagens dovra dapli temp da planisaziun. Perquai vul Reto Gurtner, il manader da l'Arena Alva SA, realisar l'emprim la part sisum. Uschia ha infurmà Gurtner a la radunanza communala da glindesdi saira.

Procedura da permissiuns da 10 onns

En cifras concretas quinta Gurtner che la procedura da permissiuns duria bunamain 10 onns per quella part, nua che la pendiculara surpassa chasas e terren privat. Auter tar la part sisum: La part da Nagens si Cassons saja realisada aifer radund trais fin quatter onns.

Durant il temp da las lavurs saja Nagens cuntanschibel cun las pendicularas da l'Arena Express. Uschia vegnia il viadi fin a Cassons a cuzzar var 25 minutas.

La part sut duai suandar il 2020

La segunda part da la pendiculara nova vegn bajegiada l'onn 2020. Ella vegn a custar 46 milliuns e vegn ad esser averta 300 dis ad onn.

Quai èn las empermischuns che l'Arena Alva ha fatg al suveran da Flem. Ils custs èn repartids uschia, che la Cassons SA surpiglia 25 milliuns francs. 21 milliuns quinta Reto Gurtner che vegnian d'investiders e da la vischnanca da Flem.

RR actualitad 11:00