Siglir tar il cuntegn
cuntegn

Surselva Plans per chasa dal club da golf Sedrun èn sin maisa

La dumonda da bajegiar per la nova chasa dal Club da golf Sedrun è vegnida inoltrada. Ella duai remplazzar il provisori ch’è gia dapi var 18 onns en funcziun ed è gia ina occasiun.

Visualisaziun da la nova chasa dal Club da Golf Sedrun.
Legenda: Visualisaziun da la nova chasa dal Club da Golf Sedrun. mad

Ina ustaria cun 48 plazs en l’intern ed anc ina giada tants ordavert. Latiers ina cuschina, biros, ina stizun da golf ed ils indrizs sanitars necessaris. Quai duai la nova chasa dal Club da golf Sedrun porscher. 750'000 francs custa la chasa. Custs ch'il club da golf Sedrun na possia betg purtar sez. Sco Daniel Gygli, il president dal cussegl d'administraziun da la Plaz da golf Sedrun SA di, sperian ins da survegnir agid finanzial da la vischnanca, da la promoziun dal turissem e sa chapescha dals commembers sez.

Sch'i grategia da recaltgar ils daners ed i dat la lubientscha da bajegiar, sche vuless Daniel Gygli gugent pudair cumenzar l’atun cun la construcziun. La chasa vegn bajegiada el medem lieu sco quai ch’il provisori è. Perquai vul ins far quai il temp ch’i na vegn betg giugà golf. Pia davent da l’october uschè ditg sco quai ch’i è pussaivel e lura suenter finir il mars e l'avrigl per esser pront il matg.

RR actualitad 11:00