Fin uss è l’anteriur rectur da la scola auta da pedagogia dal Grischun e teolog Johannes Flury il sulet candidat uffizial. Vuschs criticas han fatg valair ch’el saja ina persuna da la Partenza, ina che haja emprendì rumantsch. Vitiers vegnia ch’el haja gia 66 onns e fiss probabel mo in president transitoric, pia in che restass mo ina perioda d’uffizi da trais onns en quest post.
Pac sustegn
Il president da la Societad Retorumantscha Cristian Collenberg, che fa la proposta da spustar l’elecziun, na po dentant betg quintar cun bler sustegn. Il president e las presidentas da las uniuns regiunalas, la Surselva Romontscha, l’Uniun dals Grischs e l’Uniun Rumantscha Grischun Central, na vulan betg spustar l’elecziun. Vitus Gartmann da la Surselva Romontscha ha detg ad RTR, che Flury saja in candidat fitg valabel ed ina persuna integra. Las trais uniuns regiunalas han 33 dals 65 delegads da la LR.
La radunanza decisiva ha lieu sonda ils 31 d’october a Mustér.