Siglir tar il cuntegn

Surselva Peter Schoch - il nov directur dal Waldhaus a Flem

Dapi l'entschatta d'avrigl è Peter Schoch nov directur dal hotel Waldhaus a Flem. El ha lavurà passa 30 onns en il sectur da la hotellaria.

Il Waldhaus a Flem ha in nov directur.
Legenda: Il Waldhaus a Flem ha in nov directur. RTR, L. Livers

Uschia è Peter Schoch p.ex. stà co-fundatur da la Capella Hotel Group, ina chadaina internaziunala da hotels da luxus, ed ha lavurà per la Ritz Carlton Hotel Company, nua ch'el è stà tranter auter responsabel per l'avertura dal Ritz Carlton Hotel a Singapur.

Plaschair e tema

El sa regordia anc bain dal mument, cura ch’el saja vegnì dumandà sch'el veglia surprender il post sco nov directur dal hotel Waldhaus a Flem. Tenor Peter Schoch in hotel enconuschent en l'entira Svizra e cun ina gronda tradiziun. Sco nov directur n’è Peter Schoch betg mo responsabel per l’entir manaschi e las lavurs da renovaziun planisadas. El è era responsabel che la strategia dal nov possessur dal hotel, la firma americana Zenni Capital Group, vegnia ademplida. Quella strategia pretenda, ch'il Waldhaus daventi betg main ch'in dals megliers hotels da la Svizra.

Portrait da Peter Schoch.
Legenda: Peter Schoch. mad

Filosofia è la clav per il success

Sia experientscha fatga durant pli che 30 onns lavurar en hotels haja mussà ch’il pli impurtant sajan ils collavuraturs. Quels stoppian adina metter il giast en il center ed era avair las libertads da pudair decider sez entaifer lur champ da lavur, senza stuair adina dumandar il directur per lubientscha. Per cuntanscher in clima accoglient en il hotel saja ina tala filosofia da lavurar indispensabla. Ord quai motiv vegn Peter Schoch sco emprim a seser ensemen cun il cader dal hotel per definir quella filosofia e co ella po vegnir vivida en il hotel.