Siglir tar il cuntegn
cuntegn

Surselva Peter Furger stat almain anc fin la stad

Ad Andermatt datti famas che pretendan che Peter Furger, il manader dal project per il territori da skis Andermatt-Sedrun, sa retiria. Quai na constat dentant betg.

Peter Furger
Legenda: Peter Furger, il manader dal project per il territori da skis Andermatt-Sedrun. Keystone

Sco Peter Furger ha ditg, saja el vegnì engaschà da l’Andermatt-Sedrun Sport SA (ASS) per sviluppar e realisar il project. E quai vul dir ch’el saja era responsabel per la segunda part da la lubientscha che la confederaziun dat, vul dir: la lubientscha tecnica per mintga singula etappa da construcziun. El quintia che quella vegnia fin la stad.

Tut giaja vinavant sco planisà

Quai ha era Markus Berger, il manader da communicaziun da l’Andermatt Swiss Alps confermà al Radio Rumantsch. El ha ditg che suenter guardian els co vinavant e sche Furger restia tar l’interpresa. Tut giaja vinavant sco planisà ed il project na saja insumma betg periclità. L’emprim indriz che l’Andermatt-Sedrun Sport ASS vul realisar la stad è la sutgera nova sin il pass da l’Alpsu. En tut vul la ASS investir circa 130 milliuns francs per colliar, modernisar ed engrondir ils dus territoris da skis d’Andermatt e Sedrun.