Siglir tar il cuntegn

Surselva Persunal d'alp n'è betg la culpa

Per l'attatga mortala d'ina vatga-mamma a Laax il 2015 na po nagin vegnir fatg responsabel, conferma la procura publica grischuna.

vatga mamma sper vadè
Legenda: Vatgas-mamma protegian lur vadels, sch'i teman ch'i dettia in privel. Keystone

Las inquisiziuns da la procura publica grischuna mussian ch'il persunal d'alp n'haja da responsar nagut. Els n'hajan betg pudì prevesair la reacziun talmain agressiva da la vatga-mamma, ha confermà il pledader da la procura publica, Maurus Eckert. La decisiun n'ha però anc betg vigur legala; Fin la fin d'avust pon ins far recurs.

Flem, Laax e Falera han prendì mesiras

Il fanadur dal 2015 aveva ina vatga-mamma attatgà ina viandanta da 77 onns en il territori da l'alp Nagens sur Laax. La viandanta era morta da las blessuras. Sin basa da quest cas han las vischnancas Flem, Laax e Falera prendì mesiras. Tranter auter ina carta cun indicaziuns, nua che las alps cun vatgas-mamma èn, e da separar cun saivs las sendas da viandar e da velo dals prads cun vatgas-mamma.

RR novitads 11:00