Siglir tar il cuntegn
Inhalt

Surselva Per Portugais n’èsi betg simpel da chattar lavur

En Surselva vivan var 1200 Portugais. Savens lavuran quels sin il sectur da construcziun. Pervi da l’iniziativa d’abitaziuns secundaras vegn uss dentant bajegià pli pauc ed uschia dovri era pli pauc lavurers. Quai ha era ina influenza per ils Portugais. Per els èsi grev da chattar in’autra lavur.

Plazzal da construziun.
Legenda: Blers portugais en Surselva lavuran en il sectur da construcziun. Keystone

Tumaisch Desax dal Center regiunal per intermediaziun da lavur a Glion discurra betg d’ina situaziun dramatica. El constateschi dentant che pli blers Portugais che usità n’hajan betg survegnì lavur sin il sectur da construcziun. Sche l’iniziativa d’abitaziuns secundaras è propi la culpa da quai u na sappian ins anc betg dir, ha Tumaisch Desax declerà. Era tar la gastronomia haja el constatà ch’i haja dapli dischoccupads dal Portugal che usità.

Nauschas perspectivas senza tudestg

Chattar ina plazza per persunas dal Portugal che vivan en Surselva saja savens grev. Il grond crap da stgarpitsch saja la lingua. Ils portugais discurrian in pau talian e rumantsch. Tudestg na sappian els dentant betg, di Tumaisch Desax. Quai malgrà ch’ils lavurers ord la branscha da construcziun possian far entras il Center regiunal per intermediaziun da lavur curs da tudestg durant l’enviern nua ch’i sajan senza lavur.

Sco Tumaisch Desax di, portia quai pauc, pertge blers portugais che sajan sur 50 hajan gì mo var 4 onns scola ed suenter gia stuì lavurar. Per quels giaja quai fitg vess d’emprender in’autra lingua ch’els dovran strusch. Per talas persunas vesa Tumaisch Desax prest naginas perspectivas da chattar in’autra lavur.