Siglir tar il cuntegn

Surselva Pendicularas sin il Scopi van en pensiun

Suenter 60 onns han las duas pendicularas che mainan sin il Piz Scopi messas ord funcziun.

Legende: Video Ultims viadis per las pendicularas sin il Scopi abspielen. Laufzeit 3:47 Minuten.
Or da Actualitad video dals 16.08.2015.

2013 ha il militar cumenzà cun la construcziun da la nova pendiculara che duai manar da Stgegia, al pè dal lai da fermada da S. Maria sin il Scopi. Là ha l’armada Svizra ina staziun da radar. La pendiculara nova duai custar enturn 30 milliuns francs. Avant ch’ins po dentant montar la suga da la nova pendiculara ston las sugas da las duas pendicularas existentas vegnir demontada. Perquai han las pendicularas existentas fatg lur davos viadis.

Il plaschair surpassa la tristezza

In pau curius saja quai schon che questas duas pendicularas vegnian prendidas ord funcziun. La finala hajan questas fatg buns servetschs. «Durant ils 60 onns n’ha quai mai dà in accident cun questas duas pendicularas» di il schef dal manaschi militar Scopi, Clemens Berther. Quai saja era in motiv per far ina pitschna festa cun collavuraturs ed anteriurs collavuraturs e lur partenarias. Sco ils collavuraturs sa legra era Clemens Berther sin la nova pendiculara. Cun questa na ston ins betg pli chargiar enturn tut il material tar la staziun amez dad ina pendiculara sin l’autra. La nova pendiculara porscha plaz a 15 empè da 10 persunas ha pli paucas pitgas ed è pli aut sur terra. Sche quai è forsa in dischavantatg cura ch’i sufla, san ins dir pir a partir da la fin d’october. Lura quintan ins numnadamain da pudair metter en funcziun la nova pendiculara.