Siglir tar il cuntegn

Header

video
Pendicularas Mustér vulan investir 90 miu. francs
Or da Actualitad dals 18.06.2015.
laschar ir. Durada: 2 minutas 7 Secundas.
cuntegn

Surselva Pendicularas Mustér vulan investir radund 90 milliuns

Var 250 persunas èn stadas a la preschentaziun dals 3 projects ch’èn sin rucca tar las Pendicularas Mustér. In ressort da vacanzas, ina colliaziun dal territori da skis da Mustér cun Sedrun ed in project d’ennavar las pistas duain vegnir realisads ils proxims onns.

Las Pendicularas Mustér na vulan betg investir perquai ch’ellas han plaschair, mabain perquai ch’i saja necessari per il manaschi, ha declerà Marcus Weber, l’acziunari principal da las Pendicularas Mustér.

Las Pendicularas Mustér èn vegnidas bajegiadas da temps nua che l’hotel Acla da Fontauna generava 30’000 pernottaziuns durant l’enviern. Giasts che gievan era cun skis. Dapi 2001 è quest hotel vit ed ins haja pudì cumpensà questa mancanza da giasts mo per part, declera Marcus Weber. Per dar ina buna basa finanziala a las Pendicularas Mustér dovira quai simplamain dapli giasts en il vitg.

Marcus Weber
Legenda: Marcus Weber, l'acziunari principal e commember dal cussegl d'administraziun da las Pendicularas Mustér. RTR, G. Hosang
Jau na sun nagin grond visiunari. Jau emprova mo da dar novs impuls a questa regiun.
Autur: Marcus Weber acziunari principal da las Pendicularas Mustér

Ressort Catrina

Perquai vulan las Pendicularas Mustér sez daventar activas cun bajegiar in ressort da vacanzas. Sco Marcus Weber ha declerà, duai vegnir realisà in ressort cun 6 novas chasas cun abitaziuns ed ina part cun chombras da hostel sin l’areal dals parcadis da las pendicularas. Ils radund 700 letgs duajan generar 30’000 pernottaziuns. «I na dovra betg in hotel da luxus», punctuescha Marcus Weber. Mustér saja in vitg da vacanzas per famiglias. Integrà en il ressort fissan a la fin era duas butias. Per realisar il ressort vegn quintà cun investiziuns da var 60 milliuns francs.

Pendiculara Sedrun – Cungeri – Cuolm da Vi

Plans pulit concrets per ina colliaziun dal territori da skis da Mustér cun Sedrun èsi vegnì mussà a la saira d’infurmaziun. Questa colliaziun è calculada cun radund 15 fin 20 milliuns francs. Ella prevesa ina pendiculara per 70 persunas che maina da Salins en la vischinanza da la staziun da viafier da Sedrun, cun ina staziun da mez a Cungeri fin sin il Culm da Vi en il territori da skis da Mustér. Là duai quai dar ina ustaria che porscha vista vers Sedrun e da la Cadi giuadora. Tant l’ustaria sco era la pendiculara duain era esser ina purschida da stad.

audio
Bunura: Pendicularas Mustér cun investiziuns da 90 miu francs
ord Actualitad dals 18.06.2015.
laschar ir. Durada: 2 minutas 4 Secundas.

Ina pista dal Cuolm da Vi fin Sedrun n’è betg planisada. Planisà è dentant ina pista be in tschancun da questa vart giu cun in runal che maina puspè ensi ils skiunzs. Per Marcus Weber èsi impurtant ch’ils bajetgs persuenter èn fitg modests e sa cumportan cun la cuntrada. I na dettia nagins experiments architectonics, anzi, i vegni bajegià uschè simpel ed uschè pauc sco pussaivel, ha el declerà.

Project per ennavar

In project che na survegn betg gist l’emprima prioritad da Marcus Weber è il project d’ennavar las pistas. En ina emprim'etappa che custa var 8 milliuns vulan ins ennavar la pista da Gendusas fin Caischavedra e la pista fin a S. Catrina.

Realisaziun en ils proxims onns

Ils projects per ennavar las pistas sco era il ressort Catrinas pon dentant vegnir bajegiads be sch’il pievel da Mustér accepta la revisiun parziala da la planisaziun locala. La votaziun persuenter duai esser ils 18 d’october 2015. Sche la planisaziun locala vegn acceptada, quinta Marcus Weber che tuts 3 projects èn realisads aifer ils proxims 4 onns.

RR actualitad bunura 06:00

Artitgels legids il pli savens