Siglir tar il cuntegn

Surselva Pendicularas Mustér scrivan puspè cifras cotschnas

Las Pendicularas Mustér han fatg l’onn da fatschenta 2014/2015 in deficit da 300’000 francs.

Pendiculara da Mustér
Legenda: L’aura ed il franc ferm han laschà scriver cifras cotschnas. mad

Il deficit saja da contribuir oravant tut a dus fatgs: per l’ina il franc ferm che procura che clientella da tschep da la Germania e dals stadis dal Benelux na vegnian betg. Per l’autra saja l’aura betg stada buna, quai ch’haja medemamain procurà per damain entradas, scriva il directur Rudolf Büchi en ses rapport.

Igl è gia il segund onn en roda che las Pendicularas Mustér scrivan cifras cotschnas. L’onn passà è il deficit stà rodund 280’000 francs. Omadus onns èn era vegnidas fatgas amortisaziuns da passa 700’000 francs.

I dovra letgs

Per evitar tals deficits dovra quai dapli giasts, e per vegnir tar quels dovria quai letgs per osps. La realisaziun dal Ressort Catrina, che duai porscher var 700 letgs, haja perquai fitg gronda impurtanza, scriva Rudolf Büchi vinavant. Las Pendicularas Mustér vulan cumenzar a bajegiar quest ressort la primavaira 2016.