Siglir tar il cuntegn

Header

Navigaziun

President dal cussegl d'administraziun da las Pendicularas Mustér, Marcus Weber e vicepresident Vincent Augustin.
Legenda: Il president da las Pendicularas Mustér Marcus Weber (sanester) ed il vicepresident Vincent Augustin. RTR, G. Hosang
cuntegn

Surselva Pendicularas Mustér: Gudogn malgrà miserabel enviern

Il quint da las Pendicularas Mustér serra cun in gudogn da var 406’000 francs. Quai dentant be grazia ad in'entrada extraordinaria.

Sco quai ch’il president dal cussegl d’administraziun, Marcus Weber ha ditg, hajan las Pendicularas Mustér fatg pervi da la mancanza da naiv il december e schaner pli ch’in milliun francs damain svieuta durant l’onn da fatschenta 2015/2016. Quai tar ina svieuta da radund 5 milliuns. En ses emprim onn sco president dal cussegl d’administraziun haja el pia gist gì il mender onn en l’istorgia da las pendicularas, ha el declerà als acziunaris. El spera ch’i dettia il proxim enviern puspè naiv, uschia che las pendicularas cuntanschian puspè ina svieuta da 6 milliuns francs.

Che las Pendicularas Mustér scrivan quest onn cifras nairas è sulet d’engraziar a la vendita da sulom a la Catrina Resort SA. Entras questa vendita po vegnir cudeschà en il quint entradas extraordinarias da var 1,9 milliuns francs. La Catrina Resort SA cumenza il mars 2017 cun la construcziun dal ressort cun var 700 letgs administrads.

L’auter onn quintan ins era da survegnir la concessiun per la pendiculara che collia Sedrun cun il territori da skis da Mustér. Quella duai esser en funcziun la stagiun 2018/2019. La stad 2019 duai lura il restaurant vegnir bajegià. Uschia possian ins spargnar custs pervia dal transport da material, ha Marcus Weber declerà.

En tut investeschan las Pendicularas Mustér e la Catrina Resort SA 75 fin 80 milliuns francs ils proxims onns.