Siglir tar il cuntegn
Inhalt

Surselva Pendicularas Mustér cumpran Hotel Sax

Il hotel Sax ha in nov possessur. Sco quai ch'il president dal cussegl d'administraziun da las Pendicularas Mustér, Marcus Weber, ha ditg a RTR sajan ils contracts da cumpra per l'hotel Sax vegnids suttascrits il glindesdi.

Il hotel Sax è en novs mauns.
Legenda: Il hotel Sax è en novs mauns. RTR, Gion Hosang

Ils motivs per la cumpra da l'hotel Sax sajan la vischinanza al nov resort Catrina ed a la scola da skis ch'è en il medem bajetg, ha ditg Marcus Weber, il president dal cussegl d'administraziun da las Pendicularas Mustér.

Hotel Sax era en mauns svedais-svizzers

Avant trais onns avevan dus Svedais cun ragischs svizras, Jan e Markus Pfister, cumprà l'hotel e transfurmà quel en ina lodge. Uss han els tschertgà in cumprader per la lodge, perquai ch'i n'haja betg funcziunà da cumbinar lur manaschi en Svezia e la lodge a Mustér sco quai ch'els avevan sa mess avant quai. En Svizra na saja quai en il mument betg simpel da far marschar in hotel, ha ditg Jan Pfister.

Naginas grondas midadas vid il hotel

Sco Marcus Weber ha ditg sappian las pendicularas cumplettar cun quest nov object lur hotel existent ed il ressort Catrina, che vegn bajegià actualmain, cun in hotel en il sectur da pretschs bass. Vi dal bajetg na saja betg previsas midadas. Las chombras sajan per exempel gist vegnidas renovadas dacurt.

Midadas vegnia percunter a dar tar la gastronomia ha Marcus Weber ditg. Ins veglia adattar la purschida als basegns da las famiglias che vegnan cun lur uffants per laschar ir a scola da skis. Igl è quintà d'avrir l'hotel cun la proxima stagiun d'enviern.

Il manaschi vegn manà provisoricamain cun il persunal da l'hotel Catrina. Cura ch'il ressort vegn averts dettia quai er ina nova soluziun per il Hotel Sax.

RR novitads 17:00