Siglir tar il cuntegn

Header

cuntegn

Surselva Peder Plaz: vischnanca turistica per finanziar infrastructura

En vischnancas ch'han da sbatter en il sectur da turissem fiss, tenor Peder Plaz dal Forum d'economia dal Grischun, la furma d'ina vischnanca turistica ina soluziun per unir indigens e possessurs d'abitaziuns secundaras ed uschia finanziar l'infrastructura.

audio
Bunura: Integraziun da possessurs d'abitaziuns secundaras
ord Actualitad dals 23.10.2017.
laschar ir. Durada: 3 minutas 17 Secundas.

Ils possessurs d'abitaziuns secundaras èn tenor Peder Plaz dal Forum economic dal Grischun, impurtants cunzunt per las regiuns turisticas pli pitschnas che han da sbatter e che han paucs hotels, dentant in grond dumber d'abitaziuns secundaras. Sch'ins veglia pudair mantegnair l'infrastructura turistica, lura stoppia insatgi pajar quella. Perquai stoppian ils indigens ed ils possessurs d'abitaziuns secundaras vegnir ensemen e chattar ina via, co ch'els pon surprender ensemen tschertas parts da questa infrastructura. Quai ha el declerà a chaschun d'in referat cun discussiun organisà da l'uniun «ir novas vias» (anteriura Pro Val Lumnezia) a Glion.

Schanza per las vischnancas

Il Forum economic dal Grischun haja fatg retschertgas tar ils possessurs d'abitaziuns secundaras ch'èn organisads en las gruppas d'interess – pia tar quels che s'engaschan ed èn plitost critics. Sco Peder Plaz di, hajan ins pudì constatar che la gronda part dals possessurs sajan cuntents. I saja sco savens be la pitschna part che fetschia gronda canera. El e persvas ch'ils possessurs d'abitaziuns secundaras èn ina schanza per las vischnancas. I dettia adina daplirs, els hajan adina dapli daners, adina dapli possessurs sajan pensiunads, sajan pli savens en lur abitaziuns da vacanzas e sajan uschia era pli integrads e s'integrads. Entras quai sajan els era pli interessads per quai che curra e passa en vischnanca e veglian era avair in pled en chapitel.

Ideas nunconvenziunalas

Cun l'interess dals possessurs d'abitaziuns secundaras creschia era il squitsch sin las autoritads communalas da porscher ina plattafurma, nua che quels possian s'exprimer. Peder Plaz vesa ina vischnanca turistica, analog a las vischnancas burgaisas. En quella èn ils possessurs d'abitaziuns secundaras ed ils indigens unids. A quella vegn surdà la cumpetenza da decider davart l'infrastructura che vegn duvrada communablamain. El è persvas che vischnancas che elavureschan ina tala soluziun vegnian ad avair en il futur in avantatg. Pertge da principi sajan possessurs d'abitaziuns secundaras pronts da sa gidar, sch'els sappian concret co e nua – era quai haja la retschertga mussà.

RR actualitad 07:00

Artitgels legids il pli savens