Empè da passa 10 kilometers lingias d’auta tensiun, pon ins reducir uschia la lingia sin mo 3,5 kilometers. Davent da Lumbrein ston las lingias dentant era vegnir rinforzadas per transportar supplementarmain l’energia producida da las rodas da vent. Per quest rinforzament èn l’ovra electrica da Lumbrein e la Repower responsablas. Ils cust per talas lingias da colliaziun surpiglia dentant Swissgrid.
L’idea da furnir l’energia sur la Lumnezia en la rait è vegnida preschentada da la firma Altaventa, la firma che vul bajegiar il parc da vent Surselva cun 20 rodas da vent en la regiun tranter Sursaissa e Lumnezia.
Ussa era cun Glion
In novum quai ch’appartegn il parc da vent Surselva è era che la vischnanca da Glion è da la partida. La raschun è quella che l'alp Cavel nua che ina buna part dal parc da vent duai vegnir construì tutga a la vischnanca da Glion, l’alp sa chatta dentant sin territori da la Lumnezia. Questa alp oriunda da Castrisch, che tutga cun la fusiun ussa tar Glion, è tenor las mesiraziuns da vent fatgas ils ultims 4 onns, il plaz il pli attractiv per bajegiar las rodas da vent.
La vischnanca da Glion che lavura cun il label citad d’energia «Energiestadt» para dad esser interessada co vinavant cun il parc da vent Surselva. Sco vischnanca vegni ella dentant betg activa, ha detg il president da vischnanca Aurelio Casanova.
RR actualitad bunura 06:00