Siglir tar il cuntegn

Header

Navigaziun

Placats cunter il Parc Adula vid ina stalla
Legenda: Ina giada betg las partidas che han pendì si placats dapertut. Keystone
cuntegn

Parc Adula Partidas inactivas en il cumbat da votaziun

Era la pli ferma partida en Surselva, la partida cristiandemocratica, n’ha betg prendì uffizialmain posiziun en chaussa. Las opiniuns entaifer la partida eran memia differentas. Auters motivs per la passivitad en il cumbat dat igl tar la PS. La PPS perencunter pudess profitar.

Els avevan entaifer la regiun fitg differentas opiniuns pertutgant il Parc Adula, di Kevin Brunold, il president da la PCD Surselva. Plinavant aveva mo ina part dals commembers la pussaivladad da votar. Uschia hajan els decidì da betg prender ina parola uffiziala.

Manchentà da prender posiziun

Tut auters èn ils motivs tar la Partida socialdemocratica. Els n’hajan sco secziun da partida betg ina gronda organisaziun, di Hans Caprez da la PS Surselva. El avessi sez stuì vegnir activ e scriver, quai haja el manchentà. Per ina n’haja el betg vulì sa maschadar en questa campagna disgustusa, per l’autra n’haja el betg vulì vegnir en ils chavels cun dus poets sursilvans.

La PPS po profitar

Fitg activ en la campagna cunter il Parc Adula è stà il president da la PPS Surselva Pablo Maissen. Quai dentant sco persuna privata, accentuescha Maissen. Ma la partida possia ussa profitar e quai en l'entir Grischun. La populaziun haja vesì ch’ils commembers da la PPS n’hajan betg tema dad era prender en maun temas fitg delicats.

RR actualitad 12:00