Siglir tar il cuntegn

Header

cuntegn

Surselva Parc Adula ha grev a Sumvitg

Cun 153 cunter 55 vuschs e 3 abstenziuns ha la radunanza communala da Sumvitg proponì da dir na al Parc Adula a chaschun da la votaziun a l’urna ils 27 da november.

Las discussiuns davart il Parc Adula èn emoziunalas. Era a Sumvitg n’è quai betg auter. Uschia hai gia dà discussiuns perquai ch'il president communal, Armin Candinas, vuleva surdar il pled a Rico Tuor, in dals promoturs dal Parc Adula, per preschentar il project.

audio
Bunura: Parc Adula – Sumvitg è encunter
ord Actualitad dals 22.10.2016.
laschar ir. Durada: 2 minutas 49 Secundas.

Quai saja tut auter ch'objectiv, hai gì num dals preschents. Las fatschentas per la radunanza communala haja la suprastanza da preschentar sezza e na betg da persunas ch’hajan interess persunals. Uschia è vegnì votà da betg laschar preschentar Rico Tuor il project dal Parc Adula.

Discussiun emoziunala

Igl è pia direct vegnì discussiunà. Cunzunt ils adversaris han prendì la chaschun da numnar lur arguments. Els averteschan tranter auter da dapli leschas e scumonds ch'i na dovri insumma betg, ma era da dapli influenza d'organisaziuns d'ambient. Quellas vegnian a guardar anc bler pli exact tge che marschia ella regiun dal parc e far recurs – quai ch’impedeschia il svilup.

Per il parc ha sulet in dals vischins prendì il pled. El ha manegià da laschar las emoziuns da la vart tar la decisiun. Il parc saja in prender ed in dar. I dettia pussaivladads da sa sviluppar, ma persuenter dettia quai er en tscherts lieus scumonds.

Betg propi surstà dal na

Il president communal, Armin Candinas n’è betg surstà dal na, che quel saja dentant uschè cler n’avess el betg spetgà. Uschia vai era cun ils vischins da Sumvitg.

Ils adversaris han plaschair ed èn cuntents ch’ils arguments han persvas. Ils aderents fan quitads. Els sa dumondan co quai duai ir vinavant. Il parc fissi ina schanza da daventar enconuschent sin champ naziunal ed internaziunal. Auters manegian ch’i saja donn ch’i vegnia adina ditg na. Il parc dessi forsa in stausch e quai fissi impurtant sch’ins veglia restar en la regiun.

Tge influenza ch’il resultat da la radunanza communala ha sin la votaziun è per Armin Candinas grev da dir. El pudessi dentant tuttavia avair influenza sin la votaziun a l’urna.

RR novitads 06:00

Artitgels legids il pli savens