Siglir tar il cuntegn

Surselva Ovras Electricas Zervreila pon tuttina realisar project

La dretgira administrativa dal chantun Grischun decidì da refusar il recurs da las organisaziuns d’ambient encunter la concessiun da la regenza per il project «lingia da derivaziun Lumnezia», communitgeschan las Ovras Electricas Zervreila SA, ha

Il lai da fermada Zervreila.
Legenda: Il lai da fermada Zervreila. RTR, S. Derungs

Il project prevesa da tschiffar aua en 5 lieus entadim la Val Lumnezia e da manar quell’aua tras ina galaria da 13 kilometers en il lai da regulaziun a Zervreila. Cun quest'aua supplementara vulan las Ovras Electricas Zervreila SA producir energia per rodund 18’000 chasadas.

Planisar ils proxims pass

Ils responsabels da las ovras electricas beneventan la decisiun da la dretgira administrativa. Suenter ch’il termin da protesta è spirà e suenter avair studegià l’argumentaziun da la dretgira vulan els planisar ils proxims pass ensemen cun las vischnancas da concessiun.

30 dis temp da far recurs cunter la decisiun

Las organisaziuns d’ambient n’èn betg cuntentas cun la decisiun da la dretgira. Tenor Anita Mazzetta da WWF Grischun, l’organisaziun che coordinescha il protest da las organisaziuns d’ambient, vegnan els a studegiar l’argumentaziun da la dretgira e decider pir suenter sch’els fan recurs tar il Tribunal federal a Losanna. Encunter la decisiun da la dretgira administrativa po vegnir fatg recurs entaifer 30 dis.

RR novitads 17:00