Siglir tar il cuntegn

Header

video
Ovra Tschar ha Ina da las pli taissas lingias da pressiun
Or da Actualitad dals 02.11.2016.
laschar ir. Durada: 2 minutas 50 Secundas.
cuntegn

Surselva Ovra Tschar: construir lingia da pressiun è ina sfida

Damai che la plaunca tranter Sursaissa e Tavanasa è fitg taissa n’èsi betg facil da construir la lingia da pressiun per l’aua.

Var 825 meters bischens èsi da plazzar davent da St. Joseph (Sursaissa) fin a Tavanasa. Sin quest tschancun surmunta la lingia ina autezza da 425 meters. Tenor il manader general dal project, Daniel Kressig, è la pendenza en il pli stip lieu pli che 100%. Quai è ina sfida per ils lavurers. I vegn lavurà en plirs lieus en il medem mument. Uschia ston ils lavurers avair quità da na betg metter en moviment crappa che pudess tutgar lur collegas che lavuran plinengiu. Adina puspè èsi perquai da montar rempars che piglian si il material sche quel rodla da la plaunca giu.

Ils bischens d'atschal che paisan fin 5 tonnas ed han ina lunghezza da fin 12 meters vegnan transportads cun ina suga sin la plaunca. Là resta il bischen vid la suga enfin ch’il bischen è buglì e fermà. Tar la lingia da pressiun veglia, ch’è vegnida construida avant passa 70 onns, eran ils bischens vegnids tratgs siadora a maun. Tenor Daniel Kressig eran da lez temp dentant era dapli glieud sin il plazzal da lavur.

Optimà ed engrondì

L’ovra electrica Tschar vegn adattada uschia ch’ella po producir dapli energia. Uschia è l’ovra electrica vegnida cumplettada cun ina ulteriura tschiffada sin il territori da Sursaissa ed ina nova centrala a St. Josef nua ch’i vegn fatg l’emprima giada electricitad. Suenter va l’aua tras la lingia da pressiun a Tavanasa nua ch’i vegn fatg la secunda giada energia cun l’aua. Uschia po la producziun d’energia vegnir auzada da 18 sin 22,8 gigawatts uras per onn. Quai è energia per var 1'000 chasadas dapli che avant. Uschia po vegnir producì da nov energia per var 4'500 chasadas.

En tut investescha l’Axpo 46 milliuns francs. La concessiun dura fin 2097. Sche tut funcziuna sco giavischà, producescha l’ovra electrica Tschar davent dals 6-6-2017 puspè electricitad.

Artitgels legids il pli savens