Siglir tar il cuntegn

Surselva Nova telecabina da 10 da l’Arena Alva

Las pendicularas da Flem Laax Falera han inaugurà la nova telecabina che maina sin «La Siala».

Legende: Video Nova telecabina da 10 da l’Arena Alva abspielen. Laufzeit 1:05 Minuten.
Or da RTR dals 19.12.2015.

La nova telecabina da 10 maina davent da la staziun S. Martin enfin sin La Siala sut il Péz Grisch. Ella è l'installaziun da transport la pli moderna sin il territori da skis da Flem Laax Falera, ha custà rodund 16 milliuns francs e remplazza ina sutgera da 3 da l’onn 1982.

Capacitad augmentada considerablamain

La nova telecabina ha ina capacitad maximala da 2'400 persunas per ura (sutgera 1’800 p/h), ina lunghezza da 3’366 m (sutgera 2’064 m) ed ina spertadad maximala da 21,6 km/h (sutgera 13,3 km/h). En 9 minutas e 21 secundas surmunta ella ina differenza d’autezza da 831,87 meters, davent da la staziun da val Son Martin (1’977 m s.m.) enfin la staziun La Siala (2’809 m s.m.). Fin a 84 cabinas da 10 pon vegnir pendidas vi da la suga.

Gondlas da Pininfarina

Las cabinas èn vegnidas dissegnadas da la famusa interpresa da design taliana Pininfarina, che ha tranter auter era dissegnà differents models da Ferrari. Las gondlas han bancs da tgirom cun stgaudament dals sezs ed ina furma externa in zic erodinamica. Grazia a quella furma possian las gondlas anc transportar persunas tar vents pli ferms che quai fiss stà pussibel cun ina sutgera.