Siglir tar il cuntegn

Header

Navigaziun

Peter Furger, meinaproject da la colliaziun dal territoris da skis Andermatt-Sedrun.
Legenda: Peter Furger, meinaproject da la colliaziun dal territoris da skis Andermatt-Sedrun. RTR, Linus Livers
cuntegn

Surselva Nova telecabina Andermatt–Nätschen–Gütsch

La SkiArena Andermatt Sedrun ha lantschà la colliaziun naven d'Andermatt en direcziun dal Alpsu.

En tut ha la SkiArena Andermatt Sedrun survegnì 11 lubientschas per bajegiar las differentas pendicularas per la colliaziun Andermatt-Sedrun. La pli impurtanta da las lubientschas è quella per la telecabina che vegn uss realisada: Las telecabinas d'otg persunas davent d'Andermatt fin il Gütsch cun ina staziun tranteren a Nätschen.

Silvio Schmid, CEO da las pendicularas Skiarena Andermatt-Sedrun.
Legenda: Silvio Schmid, CEO da las pendicularas Skiarena Andermatt-Sedrun. RTR, Linus Livers

L’emprima badigliada per la staziun a val da Andermatt–Nätschen–Gütsch è in pass impurtant per la colliaziun dals territoris da Skis Andermatt-Sedrun. Silvio Schmid il directur da las pendicularas Andermatt Sedrun Sport SA ha manegià, che cun quest act stoppian era ils davos che dubitavan da questa colliaziun conceder ch’ella daventa uss realitad.

Bigliets da skis tar la viafier

Per pudair realisar la staziun a val ad Andermatt hai duvrà betg main che 72 variantas. La pli gronda discussiun hai quai dà pervia da l’entrada en il vitg d' Andermatt. Ils ins vulevan per tut pretsch che la staziun da viafier saja era gest l’entrada per ir cun las cabinas telefericas. Tut avess stuì esser cuntanschibel tras in tunnel e quai cun Skis. Quai na vegn dentant betg realisà uschia. Davent da la staziun da la viafier Matterhorn Gottard datti in sutpassadi per ir a pe ed alura pon ins cun in band sco ins enconuscha da la plazza aviatica ir enfin la staziun da val da la telecabina nova.

Quai saja la meglra schliaziun e surtut la pli favuraivla, ha ditg Schmid. A la staziun da val da la nova pendiculara na vegnan betg vendids bigliets da skis. I vegn a dar ina collavuraziun totala cun la viafier Matterhorn Gotthard. Tut ils servetschs da bigliets datti mo en la staziun da viafier.

Investiziuns da 130 milliuns

En tut vegn investì 130 milliuns francs. Cun quai vegnan bajegiadas set novas pendicularas e sis vegnan remplazzadas. Sulettamain ina vegn renovada. Quest atun vegn inoltrà la dumonda per las duas davosas pendicularas, quellas che mainan sin il Schneehünerstock. Pir cura che quellas duas pendicularas èn realisadas è la colliaziun vairamain realisada.

RR actualitad 06:00