Siglir tar il cuntegn
Inhalt

Surselva Nova speranza per hotel Acla da Fontauna

Dapi 15 onns è il hotel Acla da Fontauna a Mustér vid. Durant quest temp hai dà bleras discussiuns e visiuns per il hotel. Ussa pari da daventar almain in zichel pli concret. La vischnanca ha numnadamain survegnì ina dumonda da bajegiar.

Visualisaziun per in nov hotel sin l'areal dal Hotel Acla da Fontauna
Legenda: Uschia pudess il nov hotel sin l'areal dal hotel Acla da Fontauna vesair or. mad

Per sviluppar in nov project sin l’areal nua che l’hotel Acla da Fontauna sa chatta è vegnì fundà ina societad da svilup. Quella ha ussa inoltrà ina dumonda da bajegiar per quest areal.

Previs èn chombras ed abitaziuns

Sco quai che la vischnanca da Mustér communitgescha, è previs in hotel cun 100 chombras e circa 200 fin 300 letgs, var 20 abitaziuns administradas e passa 50 abitaziuns. Il project inoltrà correspundia a la planisaziun d’areal Acla da Fontauna. La dumonda vegn ussa examinada formalmain è lura publitgada.

Sco quai che Jon Andri Moder, il mainafatschenta da la societad per il svilup Acla da Fontauna ha ditg, vegnian ins a tschertgar investiders cura che la lubientscha da bajegiar saja avant maun.

Commembra da la societad per il svilup Acla da Fontauna è era la Due Sentieri SA che tutga a Franz Hidber. Quella societad acziunara è vegnida fundada cun l’intenziun da construir in project turistic a Mustér. Per quai ha la Due Sentieri SA era dapi 2009 il dretg da cumpra per il hotel Acla da Fontauna che s’auda a la Banca Chantunala Grischuna.

Hotel Acla da Fontauna
Legenda: Il hotel Acla da Fontauna è dapi 15 onns vit. RTR, H. Giger

Dapi 15 onns vid

Il hotel Acla da Fontauna a Mustér ha dà durant decennis suttetg a giasts da vacanzas da la Belgia. L’onn 2000 n’ha l’Intersoc, ina societad d’ina cassa da malsauns beltga, betg pli prolungà ils contracts d’affittaziun dal hotel ed uschia n’era betg pli emplenì ils 550 letgs. 15 onns è el pia vid ed en quests 15 onns èsi vegnì discutà bler sur da l’object a l'ur dal vitg da Mustér. Adina puspè hai dà speranzas ch’insatgi cumpria l’hotel e fetschia insatge ordlonder. Fin ussa èsi dentant restà tar las ideas.