Siglir tar il cuntegn
cuntegn

Surselva Nova punt veglia da lain per Glion?

Tenor ina communicaziun da l’agentura da novitads ANR, vul ina gruppa „d’in per vegls da Glion“ reconstruir la veglia punt da lain sur il Rain.

Maletg da Glion cun la punt da lain veglia.
Legenda: Maletg da Glion cun la punt da lain veglia. MAD

In dals commembers da la gruppa è Jürg Schmid, dentist a Glion. La punt reconstruida duess promover il turissem ed entras quai era l’economia. Per Schmid pudess la punt servir en emprima lingia sco passagi supplementar per peduns che van sur il Rain. Ella pudess era servir sco lieu cuvert per la fiera emnila da Glion u per festas. Ina emprima stimaziun dal custs haja mussà, che la reconstrucziun da la punt tenor ils plans vegls dal inschigner Richard La Nicca custass tranter 2,5 e 3 milliuns francs.

Resalvas da la politica communala

La punt actuala da betun, construida l’onn 1962.
Legenda: La punt actuala da betun, construida l’onn 1962. RTR, L. Livers

Aurelio Casanova, il president communal da la vischnanca da Glion, ha simpatia per l’idea da reconstruir la punt da lain veglia. El ha dentant era resalvas. Memia bleras dumondas na sajan anc betg scleridas. Per exempel sche la punt duess puspè remplazzar la punt existenta u vegnir bajegiada dasperas. Era ils custs da construcziun da 2,5 enfin 3 milliuns metta Aurelio Casanova en dumonda.

Construida l’onn 1852

La punt da lain veglia è vegnida construida l'onn 1852. Ella aveva ina lunghezza da 54 meters ed era bajegiada per autos cun ina autezza maximala da 4,2 meters. Il pais maximal per vehichels era 12 tonnas. L'onn 1962 è la punt vegnida rutta giu per far plaz ad ina punt moderna da betun, la punt existenta. La punt da lain era daventada memia flaivla per supportar il traffic grev. Da lez temp nagin che ha cumbattì per mantegnair la punt. La decisiun per remplazzar la punt è stada unanima.