Siglir tar il cuntegn

Header

video
Offensiva solara Tujetsch
Or da Telesguard dals 23.11.2022.
laschar ir. Durada: 3 minutas 7 Secundas.
cuntegn

Nova ovra solara en Tujetsch Electricitad per 3'000 chasadas

L’interpresa Axpo vul construir en la Val Nalps sin l'intschess da la vischnanca da Tujetsch in'ovra solara alpina. Planisà èsi da realisar in'ovra che producescha 13 uras gigawatt electricitad l'onn – avunda electricitad per radund 3’000 chasadas.

Il mument sajan ins anc en la fasa da planisaziun ed era da l’examinaziun ecologica. Ma las premissas per in'ovra solara sajan dadas en la Val Nalps, ha ditg il CEO Martin Schwab da la CKW, in'interpresa da l’Axpo. L'uman haja gia oz ina gronda influenza sin la regiun alpina cun il lai da fermada e cun la plazza da sajettar da l’Armasuisse, ha era accentuà il president communal da Tujetsch Martin Cavegn.

audio
Plans per ovra solara en Val Nalps
ord Actualitad dals 22.11.2022.
laschar ir. Durada: 3 minutas 36 Secundas.

Tuttina vegnian els a laschar cussegliar e vulan spetgar sin l’examinaziun ecologica per pudair decider sur da tut. Circa sin la surfatscha da 12 plazzas da ballape duajan vegnir montads 30’000 moduls solars. Il project portia surtut dapli energia l’enviern. Là pudess l'electricitad vegnir stgarsa en ils proxims onns, han tut ils responsabels communitgà a la conferenza da medias communabla.

Axpo vul augmentar la producziun d’energia solara

Per l’interpresa saja essenzial da pudair augmentar la producziun solara. Perquai veglian els ils proxims onns, fin il 2030, augmentar la producziun, per porscher electricitad per 300’000 chasadas. Ins haja il mument radund 10 ulteriurs projects en mira, ha ditg il CEO da l’Axpo Christoph Brand. Nua na possian ins anc betg tradir, ma tut ils projects sajan en las Alps, pertge be là possian ins realisar talas ovras solaras. Els avessan gugent investì gia pli baud, ma la basa legala mancava fin ussa, uschia Brand. Ils proxims onns vul l’interpresa investir 1,5 milliardas francs en questa offensiva solara.

RTR novitads 12:00

Artitgels legids il pli savens

Scrollar a sanestra Scrollar a dretga